Ondjivisiro yokutja tji ye ri 28 ku Kambundu mari rire Eyuva rOmazemburukiro wOtjiṱiro Otjindjandja tjOvaherero nOvakwena tja yakurwa omuano wapeke tjinene i yozondekurona tjiva.
Oritjavari ozombara zOvaherero, Ovambanderu nOvakwena otji za zemburukire eyuva ndi pOruveze rOmapwikiro woviuṋe Vyongutukiro mondivitivi yotjihuro tja Tjomuise. Potjikando otjitjavari okuza kombura ndja zuko ozondekurona otji za tya kutja nambano maze utu okurizemburuka ombura aihe momayuva ngo ngandu ohoromende tji ya tye kutja mari zemburukwa kotjiveta otja kombepo yOmbongarero yOtjiwaṋa yo 2016. Posi ya ngamba yarire ozombura hambondatu (8) kape ya nyinganyinga otjiṋa.
Oritjavari ozombara tjandje outa za rumbire okuzemburukisa otjiuru tjehi kutja ngamba ve undja kohoromende kutja eyuva ndi, ri zemburukwe kotjiveta nu rire eyuva romasuviro. “Otjiṋa otjiṱiṱiṱiṱi ohoromende yetu tji mai yenene okutjita okutuvatera kokutja atu ha zembi imba mbe ripunguhira ondando yokutja ngatu yandekwe, ootate noomama wotjirwa tjokupirura mutjo owo mu ve hi na va ivaiva nave [pirukire omakamburiro wehi retu naro okurapwa,” kohoromende yohuurire yombangu youmuhoko ya South Afrika. Omuhungire weyuva Ombara Onene Tjinaaṋi Maharero wari aye rihupike okuraera otjiuru tjehi nao. Posi ya ngeri omambo nga rirwe ko kutja ohoromende ya tjivisire eyuva ndi kutja okuza kombura ndji mai yende mari zemburukwa. Oruuano rwa Afrika rwa tya kutja o-2025 ombura yotjisuta kOvaafrika na mba zirire mOfrika.
Oministera yOndjivisiro nOmapitisiro Korukuiko, Emma Theofelus, ongwa tjivisire ondyero yOkambineta ndji. Ama tja: “pendje nokuzemburuka eyuva ndi, mari rire eyuva rokusuva, wina omayuva warwe omahuze nga tjama nomakuruhungi wOtjiṱiro Otjindjandja maye rukirwa naye tungirwa ozombindi. Tjeri otjiṋa tji matji tji kutja kangamwa eyuva ehuze komihoko pekepeke vya Namibia tjingetjo ye yozikwe.
Ondangere Ngeke Katjangua ongwa hepurire kozondekurona, mu mwari Omuhaamise wOmbongarero yOtjiwaṋa, Peter Katjavivi, eye ngwa yetere ombuze yeyuva kutja mari zembukwa kotjiveta okuza mombura ndji mai yende.