Jazema Hangero

Omuhingirirepo worutu romitanda vya Pukiro, Uzuva Hevita, ma tja oukokure womitanda nomananeno pa sana nombura ndji roka kombanda yondundu. 

Hevita wa tjere nao kotjimbumba tjomitanda vya Pukiro Oritjatatu nda zuko mbyari amavi ripaha. 

Ma tja ohoromende i kondja pu mai yenene nozoporondjeka pekepeke okuyera ehupo romitanda posi ya ouzeu mbu ri po ozondjivisiro nḓe havasa moruveze.  

“Tjazumba ovandu vetu tji mave ya kombepo kutja omoratiyo poo ngamwa momahakaenisiro wouye wakandino ve hungira aayo oviṋa ovipupu okuvimuna posi ya tji we ya pozomberoo o kazuva oviṋa vyarwe ondundu mbi kateya omundu ombango yokuzera okutjita omaningiriro.”

 Komurungu Hevita ma tara komayerurukiro wovahongwa mbe hikikwa ozondjasa zoutoṋi nu mba takavara pehi mena rokuhina oviungura, ongaro ndji ondji taurisa omitanda okuyenda komahi wopendje okukaponda ehupo kwarwe. Omitanda mena rokuhina oviungura vya uta okupandjara omuhunga. 

“U vaza omundu ngwe rihonga Oumiṱiri wa karira Omuporise, munda mbwi Oporise i rihonga oumiṱiri ngunda ai ri Oporise otji pe noumba uri mehi ndi.” Hevita ma zeri kutja ohoromende i paturure ozonganda zoviungura novirandisiwa motukondwa atuhe nḓu maze vatere okuhenununa ouhepe woviungura mehi.  

U nongendo norukondwa rwa Maheke, rwounatje mbu ṱa i yondjara mena rousyona ngunda orukondwa aru tjiukirwa konyama ombwa yonḓengu ndji pita okuyenda komahi wopendje.  “U pitisa vi ovikurya ovandu mehi roye ave nondjara?” 

Ma pata ama ningire ovanane moviṱo avihe okukara nongengezero noukeke tji mave toora ozondyero poo tji mave twa ko ominwe kozonḓuvasaneno tjiva ku nomahi warwe orondu oumba nonyonokero mai kaṱuna kehupo romitanda.