I Kae Matundu-Tjiparuro
OTJOMUISE
Ozondekurona zOvaherero nOvambanderu okuza mouparanga wa South Africa nganduu ko Namibia na Tjauana omayuva womasuviro inga mazeundjirwa oku woronganena motjihuro o Lephalale.
O Lephalale tjiri mOrukondua rwa Limpopo mo South Africa. Ozo mazezemburuka ozombura esere zomavazero yOmbara Otjitambi yOvaherero yoruveze rovita kuna Ovandoitji, Samuel Maharero, mehi indo.Otjirongo ihi ombura ndjazuko oku kwa kawirire Ombara yOngwatjindu omuyaruke David Kakmbazembi ngwari mouyenda wokuteza omatupa waihe omunene Ombara Kounjonua Kambazembi.
Ombura indji o 1907 mokati Maharero otja kavaza mo South Africa eye nove mukongorere tjiva tjivaza no kuhuka omwinyo movita vyo 1904-1907 pokati kOvaherero Ovambanderu munda umwe nOvandoitji munda imbo warwe.
Wina ovo vahuka era rokutja omuhoko wa kOuherero ngauyandekwe ndazuvarisiwa iyo Ongenerara Lothar von Trotha mo Namibia oruveze indo ndaa ritjiukwa otjo South West Africa. Von Trotha wari omuyandje wembo worupa rovita rOvandoitji. Eye kanaa wazuvarisa eraa indi uriri nungwari wina otjomunane worupa rovita weritua momaunguririo nokuhina ondjenda, ombindu komutina poo otjari. Mena re raa indi omuhoko oruveze indo mbwaa utataimbwa potjivaro o 80,000 okuwasanena tjiwarira orupyu uriri nu otja tji wa pizuka nai tjiva vakarira o voo Tjauana noo South Africa.
Omazembukiro inga maye kaondja kehi yomambo omaomborore ngumayetja nai: ” Ozondambo ovakuru novati vetu nduvezesa kombunda mOrutjindo rOtjitiro tjao kanaa zezengi kaparukaze nu matu zeteza noku zekongorera nganduu kongaaruhe ….”
Movimbumba mbi mavyundjirwa po mazemburukiro inga muna ozombara zOvaherero okuza mo Namibia na Tjauana, tjimuna Ombara Otjitambi yOvaherero Kuaima Riruako nOmbara Kaumo Maharero okuza ko Mahalapye ko Tjauana. Wina mapekara ovanene vohoromende yorukondua rwa Limpopo mumuna o ministera yorukondua yOmanyando nOvyombazu, Joyce Mashamba.
Pendje nomahungi peke peke tjimuna omakamburiro ousupi wo makuruhungi iyonongo yo makuruhungi womuhoko, Jarimbovandu Kaputu na Venaete Tjivasera nawina ondimwa yovita vyo 1904-8 ndjina onongo Zed Ngavirue, tjarwe tjima tjimunika otja tjimwe tjovitjitua vyo mazemburukiro inga otjinene otja korutuu omairo kombongo kovarama indji o Werkendam.
Ozonduna peke peke mu muna omutize wotjihuro ihi o Lephalale, Orata Mogothlane, maze katuapo oruzenga kozongungu zovati. O Werkendam iimwe yozavarama Ombara Maharero novandu ve ku vapizirwa okuza mo maturiro we omatenga mo South Africa, o Groenfontein ohoromende yohuurire mo South Africa oruveze indo tjiyazikamisa Oveta yEhi yo 1913.
Oveta indji aa itjaere ovazorondu vetano no kombanda ya nao okutura movarama imwe. Ombara Maharero no tjiwana tje vatjinda mo Groenfontein na ve rimbara moupanranga worukondua rwa Transvaal aruhe tjinene koutjiro na komamuho . Oruveze indo wari nozongombe o 260, oukambe o 12 nozondu nozongopo azehe kumwe o 130.
Ovaherero vaturire mo Werkendam nganduu mozombura inda ndu mazeutu nombura indji o 1990. Ozombura tjimazeende ama zekurupa eye wauta okwiihamenwa iyo konganda posya ouhonapare aupanda kutja makotoke.
Okuzambo eye watjindira ko Tjauana ka katira mo Serowe tjiyari 14 ku Tengarindi mo 1923.