I Kae Matundu-Tjiparuro OKAKARARA Ongwaye tjai tjatupuka tjaisa otjiwana mongaro mutjiri? Ombara Alex Kaveru wapurire Oritjatano ngurova mombinika ye. Momwinyo tjingewo wazirire natja kapena omwano warwe Ombara David Tuvahi Kambazembi wai otjiwana wetjesa moruntjandja. Nambano tjasewa kwiimba mbasewa ko okuzamba okutuna imbi mbyapirama nokuwaneka otjiwana omwano tjimuna mbutjawanene ongurova indjo natjirire omundu umwe. Ombara John Tjikuua watjere okomiti yombwaneno otjiungura tjayo yamana tjiyasewa natjo okuyarura ondaze. Posyo ngunda aveundja ondaze yokomiti tjitja tjitirwe atjitjitua. Kutja ongwaye eye wasewa omupotu nokuhina omambo. Posyo okomiti ngunda opwiiri notjiungura tjiyapewa. Benestus Kandundu watjere Ombara Kambazembi wa hongorera orukondua rwa Tjozondjupa otjomunan mo vyoututa nahapandere poruhaho atjiwa kutja oruveze roruhaho orune nduheri oorune. “Kaari neruru aatjiwa ohepero youpupurukwe,” Kandundu watjere. Rudolph Hongoze wa hungirirepo orutu orutjangere rozombara natja ondjira yozongondjero Ombara Kambazembi makawondja zari neputi. Nandarire kutja oo ihe varwira ehi indi eye kaa varwa. Nandarire kehi rOvandoiitji eye wakapanda okuyandjera otjisuta tjombindu yoo ihe okutierwa mehi rozonganda nungwari tjikotoke konganda puna ovanane ovakwao vombazu. Hongoze watjere wakaondja kehi yondatumisire nongondjero amaraisa ongono ndjiri mohoromende okukaondjisa ovyombazu. Ongondjero indji wakara nayo nganduu Joh Pandeni tjatoora oviketjere vyoministeri yomananeno wovyombazu wina karaisa ondjuriro yao. Wina wakara no ngondjero yo kuwanisa ozombara zOvaherero nazarwe. Wari omunane wo zongondjero zo zondando muzo mumwee kuseinina omakotorero wa ihe omunene kehi roo ihe ndjiri ondando Omeurisiro wayo ndjekemuwisire ko Lephalale ko South Africa. Okomiti yOtjitiro Otjindjandja mombinika yayo ndjareserwe iyo Serekaze Margott Mbeuserua, yatjere yari ondero yOmbara kutja ozokomiti zewane. Munao otjimaizeri kutja ondiro yOmbara kamungandjo ina otjiwa tjimaiyeta. “Tji mo tuzuu na tji ua kahakaena noo tate mbe ku tengerapo, tu hindiree otjiua kutja ondero yoye iye nenisiwe ozokomiti zewane,” ombinika yatjere nao. Orovyungura wina patjirirwe na peuhara omahungi wo zonduna peke peke nganduu mapeta tjimaikatona ondano ovimbumba tjivyasekamene okuyenda kozongungu zOnguatjindi pOndundu ya Tjozondjupa. Movahungire veyuva indi mwari ozombara, ovanane vovira nawina ovakuramenepo vozohoromende ya Namibia noya South Africa, ndjakuraramenenwe po iyo mutize wotjihuro Ombara Kambazembi kakawirire, Oserekaze Orata Tlotlanag Mogotlane. Mehungi re ondekurona yOvaherero pomatumbo Ombara Kambazembi kakawirire, Kamutuua Kandorozu, watjere vakarere nehungi ekoto nOmbara okuza ko polotika, ombiwko, otjisuta tjombindu nOmbwiko ya Peke yOvandoitji nokutja ozondekurona zOvahereo momahi wozonganda zapaterwa pendje nayo ngunda ohoromende yOvandoitji ayi raisa otjo: “nduvasaneno yombwiko yovitjitua momaturiro waimba mbahahaurwa iyo vitukaungura vyohuurire yOvandoitji”. Wina vatunine kohani yozombara zOvaherero nawina ombongarero yOvaherero ndjari mOkakarara momautiro wa Seninarindi nako zongutiro zayo. Ovo mo South Africa otjivari nomaundjiro kutja eye ongumevetumbura. Watjere otjina tjimwe muva kupasanene yari ohepero yo mayapuriro. “Ndoovazu kapena omazengururiro mokakti ketu ngahino oruveze rwahoro okupaha omuyapure,” Kandorozu watjere. Watjere munao Ombara Kambazembi yavarekere Omuhonge Papo naye, Kandorozu, okuwomborora omayapuriro. Kandorozu watjere ondunge yokuyapure kayo muyaruke erike nungwari otjiraisiro tjokutja atuhe tuaurwa nohani nokutja epango riura ouzeu nu wina ohani ndjiripo omondero yovanavita. “Munao kutja ombepo ye iture mokati ketu ete tuasere okutoorera imba pararisire,” Kandorozu watjere. Tjiva vyo vitjitua oviyerayere noviyandje vyo nyune eyuva indi wina mbyapere etando rOmbara otjivara tjapeke tjondjozikiro ya katjotjiri yoruhwe rombazu yari ozombimbi, ozondoro, ozonderera zopehi no yokoukambe. Movahenendu mbari pombakero indji yari o Ministera yOmahi nOmahandurisiro, Jerry Ekandjo, ngwayandjere ombinika yoruhoze okuza kotjiuru tjehi. Oministera yOmananeno wOtukondua nOzongomainde, Omakongomisiro wOmara nOmekurisiro wOkozombanda, Kazenambo Kazenambo, wayandjere ombinika yo Ministeri ye otjo ministeri ndjina omerizirira novitjitua vyo mauhonapare wombazu. Oministera yOmapimbasaneno nOzongetjefa, Imanuel Ngatjizeko, wakuramenene po o Swapo, o Swanu yakuamenenwe po iyo Presidenda yayo onguri noruvao rwayo Hitjevi Veii, o DTA iyo munane wayo, Katuutire Kaura, nu o CoD iyotjiuru tjayo, Ben Ulenga.