Opolisi moshitopolwa shaMusati oyi li molukongo lwapastoli gongeleka yopambepo sho anuwa a kwata koonkondo okanona komimvo 13.

Omukuluntu gwopolisi moshitopolwa shaMusati Ismael Basson okwa ti oshiningwanima shoka osha holoka momukunda Onandjandja moshikandjohogololo Onesi.

Otaku hokololwa kutya pastoli ngoka anuwa okwa li a yi mepya lyaandja yokanona hoka e te ka ithana ke ye ku ye.

Oshoka anuwa okanona ka keshi elalakano lya pastoli okayi ko ku ye.

“Anuwa okwa li ye ende pamwe nokanona hoka yu uka pooha dho dhalate yopuushinda mpoka e ka lombwele kiihule e te ka longele omuyonena,” Basson ta hokolola.

Ta ti pastoli okushiwike nawa oshoka oha zi momukunda gumwe nokanona hoka a kwata koonkondo.

Ta gwedha po kutya opolisi oya longo nuudhiginini okukonga omufekelwa ngoka pethimbo ya li ya lopotelwa oshiningwanima shoka ihe oya hulile muunyengwi.

“Opolisi otayi tsikile nolukongo notayı indile woo oshigwana ngele ope na ngoka e na uuyelele mpoka pe na omulumentu ngoka a nothele ko opolisi opo a tulwe miipandeko,” ta indile ngaaka.

Basson okwa ti iikundaneki onkene tayi tsikile okukundaneka omakwato koonkondo moshilongo ashihe, shoka tashi kwelengendja nayi.

Okwa holola euvonayi kiiningwanima yi nyanyaleka tayi holoka moshitopolwa she, nonando anuwa taya kondjitha oku yi lwitha yi shonopale nenge yi hule po thilu.

Komufala Basson okwa ti, otashi piyaganeke notashi kwelengendja nayi, okuuva oonkundana dhomakwato koonkondo nonando opolisi moshitopolwa ya kala noku gandja omalongo kombinga yokukeelela iiningwanima yatya ngaaka.

Okwa li kwa ningwa oshiningwanima shimwe shi nyanyaleka sho okanona ka tetwa nokukwatwa koonkondo moshitopolwa shaMusati.

“Onkundana ndjoka yokanona komimvo hamano ka tetwa puukiintu nokukwatwa koonkondo, taku gwedhwa yomulumentu a dhipaga omukiintu gwe noku mu mangeleka oya li ya uvitha ndje nayi noonkondo,’’ ta popi ngaaka.  

Basson okwa ti okanona hoka oka li ka tetwa nombele puukiintu e taka kwatwa koonkondo kokamatyona okamwayinagona komimvo 16.

-vkaapanda@nepc.com.na