Oshibofa shomupilisteli wongeleka yaKatoolika kaRoma koRundu ta tamanekelwa edipao loutekulu vavali, otashi ka udika momhangu yaHangwena momafiku 16 Maalitsa neudo. 

Pata Max Haudapiti oo a li e na omido 31 pefimbo loshiningwanima mongaha ota ningilwa manga omakonakono opamadiladilo. 

Otaku hokololwa Haudapiti a li e ya okutalela po keumbo lavo komukunda Onakaolo moshikandjohoololo shaNgenga, moshitukulwa shaHangwena eshi vati a ponokela nokudenga omitwe doutekulu polupanda losamende, pehe na olushindo lasha. 

Ingaveuya Tyapa weedula nhatu okwa xulifila meumbo omanga Moses Erickson weedula hamano a ka xulifila koshipangelo. 

Omukulunhu koshikondo shokukonakona oimbuluma moshitukulwa shaHangwena, omupedukomufala Melanie Mburu okwa koleka ta ti omhangu otai ka yandja olopota kombinga yaHadaupiti ngeenge oku na oudu wopamadiladilo. Mburu okwa ti omutamanekwa ou okwa ninga oule womwedi koWindhoek ta ningilwa omakonakono opamadiladilo molwaaashi okwa didilikwa e na oupyakadi wopamadiladilo. 

“Omutamanekwa paife oku li koshitaashi shopolifi kOhangwena ashike fiyo opa pa ina tu lombwelwa kombinga yoidjemo yomakonakono molwashi oshi li oshinakuwanifa shomhangu,” ta ti. 

Omudo wa dja ko pefimbo Kundana a talela po eumbo lavo, ina yomutamanekwa Blandina Haudapiti okwa hokolola ta ti efimbo longula lwopotundi 07h30 okwa pendulwa kuMax ta ti ne uye a ka tale oshiponga. 

“Eshi nda ya pondje okwa twala nge monduda omu hamu nangala ounona,” ta ti. 

Okwa hokolola ta ti mokufika monduda okwa hanga mo okaana kokakadona ka xulifa ke li pedu mekungu lohonde omanga okaana kokamati ka dinda komutwe ta ka kondjo nomwenyo. 

Okwa hokolola ta ti Max okwa li ashike a pita po peumbo shaashi okwa li ta i koshivilo shongeleka yavo sha li kOshikuku. Moshinigwanima shi lili , omulumenhu weedula 34 e na oudu wopamadilaadilo okwa dipaa xe eshi e mu tetaula nomakatana konima yoivike ivali komukunda Okambebe moshitukulwa shaHangwena. 

Omudiakoni weedula 68 wongeleka Roman Catholic naye oku li modolongo shaashi a dipaa omonamati weedula 31 nondjebo koKavango West omudo wa dja ko. 

-fhamalwa@nepc.com.na