ONAKAHOLO – Pata wongeleka yaKatoolika kaRoma weedula 31 ota holoka nena momhangu yaHangwena konima eshi vati a dipaa okatekulu kokakadona keedula nhatu. Okamati keedula hamano oke li monghalo ii koshipangelo shaShakati.
Oshiningwanima eshi osha ningwa Etitano efimbo longula komukunda Onakaholo moshikandjohoololo shaNgenga, moshitukulwa shaHangwena.
Pefimbo Kundana a talela po eumbo lavo, ina yomufekelwa Blandina Haundapiti okwa hokolola ta ti efimbo longula lwopotundi 07h30 okwa pendulwa komufekelwa ta ti ne uye a ka tale oshiponga.
“Eshi nda ya pondje okwa twala nge monduda omu hamu nangala ounona,” ta ti.
Okwa hokolola ta ti mokufika monduda okwa hanga mo okaana kokaadona ka xulifa ke li pedu mekungu lohonde omanga okaana kokamati oka dinda komutwe taka kondjo nomwenyo.
Haundapiti okwa yelifa ta ti omudo wa dja ko okwa li va lopotelwa omufekelwa ta endelelwa koudu wopamadilaadilo.
“Okwa li e li ketumo koSwakopmund pamwe noopata vakwao ashike onda dengelwa ongodi kutya ota kwatwa komhepo youdu wopamadilaadilo,” ta ti.
Okwa weda po ta ti meumbo lavo inava didilika omulumenhu ou e na oudu wopamadilaalo nonande ovanailonga pamwe naye ve shi mu lopotela kwa li.
Okwa hokolola ta ti omufekelwa okwa fika Etine efimbo lokomatango a dja koRundu.
“Okwa pita ashike peumbo molwaashi okwa li ta i koshivilo shongeleka yakatoolika sha li kOshikuku mexuliloshivike,” ta hokololo.
Haundapiti okwa ti okwa kumwifa koshikumungu eshi molwaashi ina didilika omonamati ongomukolokoshi.
Omukulunhu koshikondo shokukonakona oimbuluma wopolifi moshitukulwa shaHangwena omupedukomufala Zachariah Amakali okwa ti ounona vati ova dengwa mosamende omitwe.
Omufekelwa okwa twalwa koshipangelo opo a ka ningilwe omakonakono ngeenge oku na oudu wopamadilaadilo.
Okamatyona keedula 12 ha ka di meumbo omo mwa ningilwa oshikumungu eshi, oka hokolola ka ti oke na elao molwaashi kakwa li ka nangala monduda imwe noonakuninga oshihakanwa.
“Ngeno naame okwa li nda hangika mo monduda ngeno naame osho onda longelwa omunyonena,” ta ka hokolola nomesho taa pololoka omahodi.
Meumbo omo okwa li hamu di ounona vatatu, onghee paife okamatyona aka oko ashike ke li mo manga meumbo.
A kumwa, kansela woshikandjohoololo shaNgenga Mathew Shikongo noku li omukalimo womomukunda omu mwa ningilwa oshikulumuna okwa ti momukunda wavo inamu ningwa nale oshikumungu shi tilifa sholudi eli.
Ovashiinda okwa li va ngudumana va kumwifwa koshimungu eshi molwaashi olo lwotete tashi ningwa momukunda wavo.
-fhamalwa@nepc.com.na
Caption: Ka dipawa… Okaana kokakadona oko ka dipawa efyo li nyanyaleka.
Efano: Otwe li pewa