KATIMA MULILO– Muzamaisi wakopano ya Popular Democratic Movement (PDM) McHenry Venaani Lasunda, nasepisize kutahisa misebezi kuba basabeleki ni kufutula sifumu sanaha mwamulelo wakubata kuhapa maikuto abaketi liketisa zanaha hali atumela. Venaani nabulela kwa libapalelo la Katima Mulilo kone kuputehezi sicaba hane ahatisa pampili ya mulelo waliketisa wa kopano ya hae. Mutomo wapampili ya milelo ya PDM, ili sepiso kwa baketi mwanaha Namibia, kikutahisa misebezi, kuyaha mandu, kuyandulula njimo ni tahiso yabukamuso sakata.

Pampili ya milelo nehatisizwe hala mutomo otwi “Bukamuso bobunde.” Nako ya liketisa hainze iatumela mwanaha Namibia, buñata bwa likopano za lipolitiki zesika patalaza kale mapampili amilelo lilibelezwi kueza cwalo mwaliviki zetaha. Mwa mulelo wa PDM, Venaani nasepisize kutisa misebezi katahisa mafakitoli mwa lilalanda kaufela zanaha ze 121, kubona kuli zende za tahiswa mwanaha, nikuzwisezapata njimo.

PDM kacwalo ibile kopano ya pili kupatalaza milelo ya teñi kwa sicaba haiba inge ibotelwa kuzamaisa naha. Hatiso ya pampili ya milelo netahile kasamulaho amazazi amalalu, kulatelela mukopano wakuketa bazamaisi bakopano mwa Katima Mulilo, teñi bazamaisi bakopano basilezi neba kutiselizwe mwa litulo. Kono kwamafelo PDM italimwa kuli nebile ni keto yende ya bazamaisi bakopano, teñi kamaiso ya Venaani nebonahalile, sina lika kaufela hane libonahala kuezahala mwana latela. 

Mwalilimo liketalizoho zetaha, kopano ika etelelwa ki Venaani (mueteleli) Jennifer van den Heever (mubakweli mueteleli), Nico Smit (mubuluki wasikwama), Manuel Ngaringombe (muñoli yomuhulu), Linus Tobias (mubakweli muñoli yomuhulu), ni muinasipula wanaha Diedrick Vries. Kuekeza kubao ki Rosa Mbinge-Tjeundo, wapili kuba mubakweli muinasipula, ni Sydney Ndumba, mubakweli mubuluki wasikwama. Zeo zamafelo kilitulo zenca. 

“Kamaiso ya kopano neli mwa sikiliti sa Zambezi mazazi amalalu kuto ambola zabukamuso bwa kopano. Kachenu PDM izibahaza milelo yabutokwa mwa pampili ya milelo, pampili kakutala ika patalazwa Labubeli,” nekubulezi Venaani hane apatalaza mulelo. Pampili ya milelo ina ni misumo yelishumi kayemine, mi Venaani naize sikiliti sa Zambezi sina ni mubu wo sikona kusebeliswa kulima lico, kono ha usebeliswi. Naize kutomohisa pilu kuli sicaba sa Zambezi kisesiñwi mokuna ni bubotana mwa Namibia yelukuluhile.

 “Kacwalo, mulelo waluna wazwelopili uka patalazwa kwanu kucinca ni kutahisa misebezi ye tokwahala, kubona kuli kuna ni lico. Zambezi haiswaneli kunjebwahala kakuli Mulimu ufumisize Zambezi,” nabulezi. Venaani naize kimwanaha Namibia feela teñi babanca bakupiwa kuli batise pampili ya sitopa sa 12 ni zibo ya musebezi ya lilimo zelishumi hababata musebezi. Uli taba yeo ya komokisa.  “Babanca bakafumana kai zibo ya musebezi haiba habasika sebeza kale mwa bupilo bwa bona? Babanca, haiba mubata kuhanela mubuso omitokwa kuli mube ni zibo ya musebezi yalilimo zelishumi, mubuso osikamifa kale kolo, kinako yakuli mubotele mueteleli yakafelisa taba ya zibo ya musebezi ni kukwanisa kufa babanca tuso mwanaha ye,” nekubulezi Venaani.