OKANGHUDI – Omupresidente omukulu Hifikepunyepunye Pohamba okwa enditha po aanambelewa taya ningi omayalulo gaantu nomagumbo pushoka ye na okuninga opo ya pondole sha.
Pohamba okwa li a kumagidha kutya omayalulo gaantu nomagumbo otaga ende ashike nawa ngele aayaluli taya kala mekwatathano ewanawa naaleli yopoondondo dha yooloka oshowo aakwashigwana.
“Otandi kumagidha aayaluli ya longele kumwe naaleli oshowo aakwashigwa opo ku kwashilipalekwe kutya aantu ayehe oya yalulwa, sho osho elalakano lyomayalulo,” ta popi ngaaka.
Natango okwa li wo a kumagidha aayaluli kutya naya longithe omikalo adhihe okugandja uuyelele, ihe haooradio nooTv ashike oshoka hakehe gumwe e dhi na.
Okwa kumagidha wo kutya aayaluli naya thike pomahala agehe mpoka pe na aantu opo ya gandje nokumona uuyelele awihe wa pumbiwa.
Omukuluntu mehangano lyoCensus Sakaria Iipumbu okwa ti, nonando ya tseyithilwa omashongo ga yooloka, omayalulo otaga ende nawa. “Ope na aantu mboka taya ka yalululwa okuza moshiwike tashi ya sigo esiku lyahugunina muNovemba,” ta popi ngaaka.
Okwa ti okwa inekela kutya omayalulo otaga ka pwa ngele kape na omayimbo ge ya po.
Iipumbu okwa li a indile aakalalimo yomoshitopolwa shaHangwena ya longele kumwe naayaluli, omolwomauwanawa gomonakuyiwa.
“Shoka sha halika omwaalu gwaantu, opo ku longekidhwe onakuyiwa ya opalela omwaalu gwaantu ayehe ye li moshilongo,” ta fatulula ngaaka.
Ta ti aanambelewa yomayalulo oya pewa uuthemba wokupula uuyelele megumbo kehe.
“Aanambelewa mboka yomayalulo otaya vulu okugandja omageelo kwaamboka itaaya iyutha unene tuu mboka taya tindi oku ya pa uuyelele nenge taya tindi oku ya pitikila momahala nenge momagumbo gawo. Omageelo taga gandjwa ongaashi egeelo lyofuto yooN$50 000, egeelo lyoomvula ntano mondholongo nenge ya pewe omageelo ngoka gaali oshita.” a popi ngaaka.
Ta tsikile kutya oshikondo sho-NSA otashi tsikile nokukala shi itula mo mokushilipaleka kutya oshilongo oshi na uuyelele wu li mondjila, wopethimbo nowu na ongushu.
vkaapanda@nepc.com.na