MoTallismanus-Kamarada Geingob kakandwirepo yiuyungwa eyi vana kutanta vantu vamwe asi presidente Pohamba kuna kumuruganesa moomu vanahara unene awo kuna kutanta asi kamarada Sam Nujoma yige ana kupanga asi Pohamba yinke navhura kurugana.
Apa kauuyungisire sigongi sosinene moTallismanus poOtjombinde, Geingob katente asi navenye Pohamba naNujoma wombunga zimwe tupu vahepa kuuyunga upolitika umwe tupu.Age katente asi vagara ava vavali nare vagusa kukara kumwe ndi asi kuruganena kumwe yipo asi yahatutukukisa nsene tavalipe magano asi ngano mbunga zoSWAPO ngapi nazigendesa epangero lyazo.
Nkuru ministera gwanare katente asi vantu ava vana kara negano lyangoso asi nampo Pohamba valinyenge naNujoma vadivare oyo kapi tayihoroka.Morwa Pohamba kuna kutura moyirugana matumbwidiro gombunga zaSWAPO omu ana kara asi Nujoma yige presidente.
Age simpe kahundilire yilyo yoSWAPO vafumadeke nompitisili dawo asi kapisi mpo zetu zokusandura vakondi.
Mbunga zaSWAPO, mbunga zonene ezi vatoterepo asi vamangurure sirongo esi, ano ngesi tuna manguruka twahepa hena kukondja mokumangurura vantu vetu paekonomi.Nkuru ministera gwanare age hena gokuhova mosirongo sokumanguruka saNamibia kapi ana kuyizuvhira mbili.Yipo asi vantu twahepa kulifumadeka nokuruganena kumwe.
Age katente asi “nampili kapi waharange twahepa kuwiza kumwe turuganene kumwe ngovana vaSWAPO”. Mbunga zaSAWPO mbunga zonene yipo asi kapisi nsene muna lizono nare ono duka ndi nare kapi ono hara kurugana name.Twahepa kulironga kugusapo udigu nampili ngapi una tugumu.Ntani koveli vana kuruganesa epuko uuyungiro womuntu nokupatana asi vantu vamwe kapi vagava eparu lyawo mokukondjera sirongo simanguruke.
Age katente asi dogoro ngesi ose kuna kutumona umbondo morwa kapi tuna kutokora ndi asi tulimburure eyi vana kuzogerera vantu vamwe.
Age kava tanterere asi mbunga zaSWAPO tazi kakara nepongo (Congress) lyazo moomu tupu vana kuligazarera nampili ngomu vamwe vana kugazara asi kapi nayikawapa. Epongo eli kapi ngali fana ngwendi lyaCoD, lyetu ngaliwapa kupitakanena.Geingob ogu ana kara asi munasipundi gombunga ezi vapasinka paupolitika woSWAPO mukunda gwaOmaheke kakadingwire Otjombinde nokukagava mukumo asi vatameke kuturapo nompitisili mwankenye ruha.
Age kava kamundindilireko vakwawo gakara nawo mokomiti zina vana kara kamarada Bernard Esau,kamarada Clara Bohitile ntani kamarada dokotora Becky Ndjoze-Ojo.