MoVenduka
presidente goSWAPO kamarada Hifikepunye Pohamba kahundilire asi mbunga zaSWAPO zahepa kutara asi yipi yina foro yipo vayigusemo,ava vana kara asi kuna kareremo tupu uwa wavene vahana kukareramo uwa wovantu navenye.Age kageve ezwi eli paapa kazegwilire epongo lyombongarero zokomitiye zontjima-ntjima zaSWAPO,sauvali kutunda tupu apa vakere nokongress zaune mosirongo zokumanguruka mvhura ezi kazipwire.
Pohamba kahundilire yilyo yombunga ezi varugane oku vana manguruka,yipo asi vantu vana tungu mosirongo esi vakare tava mona uwa.Age katente asi epongo eli enene unene,ntani hena kwavatamba yirugana yoyidigu eyi vanduruka mediveta.Twahepa kuruganena kumwe yipo tuture yirugana neparu lyovantu vetu pontambo nazo peke.Komitiye ezi zahepa kurugana asi matokoro aga twatulire posiruwo sokongress kaze moyirugana.Yipo asi twahepa kupapara nompito omu natu yitura moyirugana nomaganop gomawa.Ntani age kahundilire vahamenimo asi vakare vana manguruka mokuuyunga yipo asi nkenye eyi tuna kara nayo tuyiuuyunge moomu nokugwana ehuliro ndi asi ngendeseso.Mokusikisamo nye eyi twahepa kulimanga liva mombunda yipo asi muhoko gwetu guparuke.Age katanterere hena sigongi esi asi eturopo lyepangero elikwamo lyo NDP 3,talizimoyirugana mvhura ezi kukwama eyereko lyoyimaliwa lyo2007/2008,unene gavademenena meyereko lyepe.Eyi ngayitugusa siruwo,mokusikisamo nzodi zetu twaturapo zomonomvhura 2030.
Age katente asi egano lyopontambo zokuzeruka ndi asi national development plans meraka lyovakwetu kuna kwateremo ekuliko lyaNamibia ngosirongo.Matokoro gokongress twahepa kugamona asi egano omu natugusapo udigu ou vana kumona vantu vetu.Age simpe kauuyungire yokuhamena rukukutu oru runa gumu sirongo,asi kuna kureta magano peke kepangero.Morwa mvhura ezi zina hulilire kuroka nongombe kuna kufa konzara.Nampili ngomu asi zina roko hawe simpe vantu noyimuna yawo simpe tava kamona yihuna.
Age kahundilire vakarelipo wonomukunda asi vagave yitundwamo yipo vatare asi ngapi navavhura kuvatera ava runa gumu rukukutu.Presidente goSWAPO katente asi age ana huguvara asi mvhura taziroko ngorooro,yipo asi vantu vapurure ano yimuna yiparuke.