■ Paheja Siririka
WINDHOEK – Osha tseyika nawa koyendji kutya olundji ombwa okuume kaantu kopothingo. Gumwe gwomaaholi yoombwa okwa li a yi moonkundathana noshifo oshimwaina naashika shoNew Era omunamimvo 29 Matthew Ipinge, ngoka e li omutekuli nomudheuli gwookatali. Ipinge okwa ilikolela nokuli oombwa dhe adhihe kumwe dhi li 14.
“Oombwa onda za ndi dhi hole okuza sho nda li omputu. Osha li omupya omunene kutya kanda li tandi vulu okukola nokutekula oombwa omolwa iinakugwanithwa mbyoka u na okukala u na uuna u na oombwa manga wumushona natango.”
Ipinge okwa li a thigi po iilonga ye opo a vule okugandja uutekuya wa gwana nawa koombwa dhe. “Onda thiga po iilonga yandje yokoStandard Bank, hoka nda li omugandjimayele uule woomvula ntano oshoka omutima gwanadje kagwa li gu uvite gwa hala okulonga iilonga mbyoka,” ta gwedha ko ngaaka. Ipinge ta popi esimano lyokupulakena omaiyuvo gomutima gwe. “Onda li kounivesiti uule woomwedhi ndatu ndele natango osho nda li ndi uvite ngaaka.” Ta gwedha po.
Sho a ndopa mwaambyoka iyali, melongo osho wo miilonga, ka li e na we nkene a ninge kakele kokutala koombwa ndhoka dha kala noku mu ithana. “Iilonga oya li ya fa iilonga, okulesha okwa li nako kwa fa iilonga ashike okukala noombwa okwa li ashike sha fa eshito nonda kala nadho pwaa na uupyakadhi washa,” ta ti ngaaka. Ipinge ta ti opo a kwashilipaleke kutya osho a li a hala shoka okwa kutha okafudhepo opo a ye muule womadhilaadhilo gasho.. “Onda li ndi ikutha mokati kaantu uule woomwedhi hamano ndi dhilaadhile kombinga yonkalamwenyo yandje naahoka ya taalela. Onda kala ndi na ehilathano pokati kokushuna kosikola nokutsa ndi thininike shika shi mone oonte dhetango,” Ipinge ta tumbula.
Okwa mono ompumbwe yokutekela ohokwe ye ndjika nokwa dhimbulula kutya moshilongo omu na ompumbwe yaadheuli yoombwa. Ashike Ipinge ke shi ashike omudheuli goombwa. “Onda tameke okutalaatala iikulya yoombwa. Ngele ou li mompumbwe yomeendelelo, kehe ethimbo tse opo tu li otatu ku yakula. Ngame ohandi longo iilonga ayihe, ngeno nda fa omuzulinkalo gwomakwatathano, ashike opokati nee kookatali nooyene yawo,” ta ti ngaaka. Oha kwathele omaludhi goombwa kehe okupitila mokampani ye yedhina PawsRUs. “Ongele oku enda mo noombwa, oku dhi fala koondohotola dhoombwa, ayihe mbyoka okati komokutsi kutse,” Ipinge ta thamauna ngaaka
Okampani ndjika oyi na oshinakugwanithwa okukoleka ekwatathano ewananwa koombwa dhi vule 30 nooyene dhawo. Ipinge okwa li wo a popi kutya oludhi lwoombwa ndoka e hole tagu pu mo olwo ndoka ‘lwoopitbul’. “Sho nda kala tandi vulu okulanda ombwa onda landa ombwa yandje yoludhi lwoPitbull Terrier, edhina lyayo oKratos nondi yi hole, unene tuu sho yi li tandi yi inekele nohandi longo nayo nuupu,” ta fatula.
Sho pe na euveko lya puka kombinga yoopitbull, Ipinge okwa li a hala oku ulika kutya oludhi ndoka kalu shi oluhahu ngaashi aantu haya ti. “Etompelo sho nda hogolola Kratos oku ulika kutya kashi na sha nombwa nenge noludhi lwombwa ashike oshi na kutya ombwa oto longo nayo ngiini.
Ipinge okwa dheula Kratos mOshiwambo owinawina oku ulika oshitsa shika osho wo a koleke ekwatathano lyawo yaali. Ta fatulula kutya okwa tameke okulonga naKratos sho a li e na omwedhi gumwe aguke, ta popi ashike naye kee na nando ontseyo yuudheulwa yasha nokwa li i ilongo mbala.
Ipinge ta gandja omayele gamwepo kutya oombwa ohadhi takamithwa ngiini pethimbo lyuutalala wa geya. “”Kongela oombwa dhoye okandunda koombwa ka longwa miipilangi, kwashilipaleka kutya oke na omweenye ko oka gamenwa, osha simana noonkondo. Iilonga yombwa okugamena, onkene kwashilipaleka kutya okandunda hoka oke li pehala pe na omainyengo ogendji, ngaashi moseti nenge posheelo shelugo,” ta gandja omayele ngoka. Ta ti ngele okandunda koombwa oka kala konima yegumbo, ombwa itayi lala ko hoka oshoka oya hala okukala tayi gamene komweelo gwegumbo naashoka osho wu wete oombwa hadhi kala aluhe dha hala okulala moseti nenge pomweelo gwondunda yokutelekela, shi ikwatelela keelo ndyoka hali longithwa unene. “Oombwa dhimwe odhi na oondunge dhokutaula po omakumbatha, onkene dhi pa iikulya oyindji pethimbo ndyoka lyuutalala, osho handi ningi yandje ngaaka, “ ta ti
Ipinge ta ti ope na iinima mbyoka hayi mu kenyaneke wo kombinga yoombwa . “Ondi tonde omuntu ta pe ombwa ye ondje nenge ofunda yooholo dhondjembo opo e yi ninge ohahu; osha simana okuninga omapekaapeko kombinga yombwa yoye ndjoka wu na manga inooyi pa iinima mbyoka inaayi kolekwa,” ta goyo ko ngaaka
Muule woomvula ntano dhi li komeho Ipinge okwa hala okuya oshilongo ashihe nenge menenvi alihe.