Charles Ndeumane
ONIIPA – Elelo lyondoolopa yaNiipa olya nyanyukilwa iizemo yolweetho lwotango yoshinyangadhalwa shaagundjuka tashi ithanwa Identify My Talent Show moka aagundjuka moshitopolwa, shoka sha kutha ombinga opo ya ulike iipewa yawo yo taya sindana oondando dha yooloka.
Okakadhona komimvo 16 Shiwana Messiah hoka ke li mondondo 10 posikola yaHans Daniel Namuhuja mOniipa oke ya ponomola yotango nokusindana po olweetho lwotango lwoshinyangadhalwa shoka.
Messiah okwa sindana po ekopi oshowo oshimaliwa shoondola N$3 000 sho a nyanyudha aatokoli naatali sho a lesha iitewo mbyoka a nyola ye mwene.
“Onda popi uutewo wandje mOshiwambo nomOshiingilisa opo ndi hokithe aapulakeni. Ondi uvite nawa lela sho nda sindana oshoka ohandi kala ndi itula mo lela ngele tandi nyola uutewo, ondi uvite kutya oonkambadhala dhandje odha ndndhidhilikwa. Ohandi nyola uutewo shi ikolelela konkalamwenyo yandje mwene, otandi tsikile nokuninga uutewo,” osho Messiah a popi ngaaka.
Ongundulwiimbo yaEgulula Omutima Goye Choir yokosikola yUukule Secondary School oya sindana po ekopi oshowo oshimaliwa shoondola N$3 000 moshitopolwa shoongundu dholwiimbo sho ya dhenge mo ongundulwiimbo yaUNAM HP Campus.
Okakadhona komimvo 11 Esther Awene hoka ka ulike oshipewa shako shokwiimba oka sindana po onomola ontiyali yoshimaliwa shoondola N$1 500 nombandi yoshisiliveli. Omanga puutitatu pwe ya aamati yaali Festus Tuhafeni naJason Namwandi mboka ye na ongundulwiimbo yawo hayi ithanwa Ila Poompadhi Dhomuwa Choir.
Mboka ya imbi omaimbilo gopambepo ngoka ya toto yo yene, oya sindana oombandi dho bronze noshimaliwa shoondola N$750.
Omunambelewa gwehumokomeho lyopamahupilo melelo lyondoolopa yaNiipa Elia Ndilipawa Shingenge okwa ti elelo oli wete kutya oshinyangadhalwa osha enda nawa lela oshoka osha li sha hili aakuthimbinga naatali oyendji mboka yamwe yomu yo ya za kiitopolwa yilwe yoshilongo molweetho lwotango. “Omwaalu gwaantu mboka ya holoka ota gu etitha oonkondo. Otwa tokola tu kale ha tu ningi omauliko guutalenti ngaka kehe omumvo. Nduno olwo lwa li olweetho lwotango, otwi inekela kutya olweetho lwa landula ota lu ka kala olunene, andola ta lu ulikwa nokotivii opo aagundjuka ya pewe ompito yo ku ulikila oshigwana iipewa yawo,” Shingenge ta ti.
Shingenge okwa ti aagundjuka mboka ya sindana ota ya ka pewa omayambidhidho ngoka ta ya pumbwa ngaashi iilongitho nenge omayele opo ya yambulepo iipewa yawo.