Auleria Wakudumo
Eenhamanhana oda holoka pokakefa komahoololo kosekundefikola Evululuko mOshakati Olomakaya, sha landula eshi omabesa avali taa fekelwa koonhumba noongadi kutya oongudu yoSwapo a holoka novanhu okudja koitukulwa yaKavango va hoolole osho sha eta omahoololo a kanghekwe manga oule wokafimbo novanhu va undulwemo meni lofikola.
Ongudu yovakwashiwana vamwe va dja molukanda vati oya kendabala okukeelela ovanhu 50, va dja mobesa opo vaha hoolole.
Omupedupresidente wongudu yoNamibia Economic Freedom Fighters (NEFF) Kalimbo Iipumbu okwa holola ta ti ova shiivifilwa kutya opena omabesa taa pitike ovanhu peenhele dokuhoolola, ashike vati ovanhu ava tava hoolola kave na oufemba notava ulike va fa vehe shi vomoshilongo.
“Obesa yotete oya hoolola, nobesa itivali eshi ye ya, ovataleli vomahoololo okudja keengudu da yooloka ova ka kala va limbililwa eshi obesa onhivali natango ya holoka okuhoolola. Otwa didilika kutya nonande ve na oukalata vokuhoolola, kape na ou ena nande okamutwe, na kape ĺna ou ha popi elaka lomoshilongo,” Kalimbo ta ti.
Hamushanga wevava lovanyasha mongudu yoSwapo koshikondo shehongo Hofni Iipinge okwa kendabala okuyelifa oshiningwanima ashishe, ashike okwa tumbwa okudja mofikola ndele ta tumbilwa pondje kovalanduli veengudu da yooloka nokweya okupopilwa kopolifi.
Molwaashi ovakwashiwana ova li va fufaeka neenghono, osho sha eta omukulunhu wopolifi mokukeelela oimbuluma mOshana, Deputy Commissioner Elizabeth Nashandi a ifane ovapolifi vopalapala ve uye va hanaune ongudu yovakwashiwana ovo vali poshivelo shofikola.
Konima yokafimbo, Nashandi opamwe nopalapala ove shi pondola okukandula po eenhamanhana novanhu aveshe ove shi pondola okukufa ombinga momahoololo.
“Efimbo lomahoololo oupresidente osho yo omutumba wopashiwana omunhu keshe ota dulu okuhoololela apa e li ile nokuli apa a hala. Otwa kendabala okufatululila ongudu yaavo kwa li va hala okuya omahoololo moshipala ashike inava hala okulongela kumwe osho sha eta tu ifane opalapala,” Nashandi ta ti.