ONAIMBUNGU - Oshiningwanima shinyanyalifa osha ningwa moshitukulwa shaHangwena onghela, omo omulumenhu vati a teta omukainhu waye nomukonda mofingo noku mu dipaa, ndele ye mwene te li mangeleke.
Oshinima eshi osha ningwa onghela efimbo longula momukunda Onaimbungu moshikandjohoololo shaMundaungilo. Oonakusa ovo Nestory Ndivayele (56) nomukulukadi waye Peneyambeko Homboleni (30).
Ounona vavo vanini, kamwe oke li mondodo yopetameko yoPre omanga kamwe oke li mondodo onhi-2, ovo va li po eembangi novatala ashishe eshi sha ningwa kuxe.
Opolifi oya hokolola tai ti konima yoshiningwanima, ounona oya kofikola noku lombwela omuhongifikola vavo kutya ova fiya xe e li meenhango monduda omanga ina a nangala mokatala e li mekungu lohonde.
Okudja opo vati omuhongifikola ova ya keumbo oko kwa ningilwa oshiningwanima shokulopotela opolifi.
Oonakufya fiyo opapa omadina avo ina shivifwa molwaashi opolifi oye li pyakidila nokuninga omakonakono.
Omukulunhu koshikondo shopolifi shokukonakona oimbuluma moshitukulwa mOhangwena, omupedu-commissioner Zachariah Amakali okwa hokolola ta ti oshiningwanima osha ningwa pefimbo ovaholafani ava kwa li tava tanguna.
Vati ounona ounona kwa li tave li longekida oku ya kofikola eshi eenhangu da tameka pokati kovakulunhu vavo.
Ounona otava ka pewa omayakulo exungomwenyo molwashi ova mona oshiningwanima shinyanyalifa osho tashi ke va piyaneka pamadilaadilo.
A kumwifwa koshikumungu eshi, kansela woshikandjohoololo shaMundaungilo Festus Ikanda okwa ti okwa hangika ashike opo a ningi omutumba novakwashiwana momukunda Onaimbungu oshivike shadja ko omo kwa li yandje ehongo nouyelele kombinga yomahepeko omomaumbo.
Kansela okwa ti elongifo nai lomalodu olo unene tai etifa oimbuluma yomalidipawo ilonde pombada momaumbo.
“Oshiningwanima eshi oshinyanyalifa notashi difa ovanhu omaxwilili unene tuu kounona vashona va mona xe e li meemhango na ina ta tuwa nomikonda,” ta ti.
Okwa kumaida oshiwana opo shi ha longife oikolwifa ihapu noshoyo shi kale alushe tashi lopota omahepeko omomaumbo pefimbo.
Shinyanyalifa…Omulumenhu a dipaa omukainhu waye nomukonda ndele te li mangeleke