Omulumenhu ehe shivike okwa fya eshi a yashwa nondjebo pefimbo kwa li a ponokela eumbo lovanhu nelalakano lokunyeka omaliko avo.

Oshiningwanima eshi osha ningilwa molukanda Gemeente moWindhoek Etitano lokeengulasha lwopotundi 03h00.

Nakufya ina tongololwa natango kutya olyelye shaashi kape na ouyelele ou tau yandje oukwatya waye onghee novakwapata vaye inava shivifilwa efyo laye.

Omupopiliko wopolifi moshitulwa shaKhomas Warrant Silas Shipandeni okwa hokolola ta ti opolifi otai indile moshiwana opo shi kale sha talela po okila yopolifi moWindhoek opo shi uye shi tale ngeenge omulumenhu ou omupambele wavo.

Opolifi oya ti omulumenhu okwa hanga peumbo inapa pata ndele ta i mo nokunukila ounona voukadona ovo va hangika tava ningi oinyangadalwa yavo yofikola.

Vati ounona ova ingida mokule fiyo xe ou e li omufekelwa medipao ta penduka ndele ta kufa ondjebo yaye.

Opolifi oya ti mwene weumbo okwa umba ondjebo mombada nokonima eshi a ka mona omulumenhu oo tava faduka po a yuka pondje okwe mu umba kolutu. Opo xulifila ponhele opo a yashelwa.

Omufekelwa okwa shivifila opolifi konima yoshiningwanima. Fiyo opapa nakufya ina tongololwa, vali nakuumba ina kwatwa po, nopolifi otai ningi omakonakono.

– fhamalwa@nepc.com.na