Omulumenhu womido 36 okwa kwatwa po eshi a hangika ta landifa oukalata voipupulu vetunhilo lombuto yoCovid-19.
Oshiningwanima eeshi osha ningwa Etivali pofitola yaye yokuprinta molukanda Goreangab moWindhoek.
Omufekelwa vati oha landifa okakalata keshe kamwe ke na N$500 kovanhu tava pulwa oukalata vetunhilo koilonga yavo.
Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omufekelwa okwa kala nokulandifa oukalata vetunhilo loCovid-19 kovanyasha ovo tava kongo oilonga mo-NDF.
Konima yoivike ivali ouministeli wetanga leameno owa pitifa ouyelele u na sha nekuto loilonga omo ovanyasha tava pula okukala va wanifa po oipumbiwa yokukala ve na okakalata ketunhilo loCovid-19.
Naashi osha eta opo ovanyasha ovo inava hala oku ka tunhilwa va ka lande oukalata voipupulu opo va dule oku udifa oilonga.
Opolifi oya hokolola tai ti oshinima eshi osha monika mo eshi omukwashiwana umwe a lopotela opolifi kombinga yomufekelwa ta landifa oukalata.
Omufekelwa ota holoka momhangu yaKatutura nena mEtine.
Omukulunhuwiliki mouninsteli wouhaku Ben Nangombe okwa ti omunhu keshe ta ka hangika ta landifa oukalata voipupulu vetunhilo loCovid-19 ota kala a kwatwa po diva kopolifi.
Okwa yelifa ta ti okulandifa oukalata voipupulu oshimbuluma sha kula shaashi omunhu ota longifa omukalo wokukengelela oshiwana.
“Ounimisteli wetu itau ka fiya emanya la londa kulikwao. Omunhu keshe ta ka hangika ta landifa oukalata voipupulu otaka ninga oshihopaenwa shavakwao,” Nangombe ta ti.
Nangombe ta ti oshiwana nashi landule omilandu odo da tulwa po kounimisteli wouhaku opo shi ka tunhilwe sho shi kale sha mona oukalata vetunhilo woshili.
“Oukalata vetunhilo ohava yandjwa komandiki ouhaku oku haku tunhilwa ovanhu. Ounimisteli wouhaku inau yandja epitikilo koshiwana shi kale tashi landifa oukalata vetunhilo loCovid-19,” Nangobe ta ti.
Okwa kunghilila oshiwana opo shiha lande oukalata voipupulu kovanhu ovo tava longifa oumbudi shaashi osha nyika oshiponga komunhu ou taka hangika naye e na okakalata koipupulu.
Nangombe okwa weda po ta ti kukeshe ou ta landifa oukalata voipupulu na kale a xulifa po oshinima eshi diva.
– fhamalwa@nepc.com.na