Omulumentu gwomimvo 36 okwa iyaha nondjembo ombaadhilila mokugulu, oosekonde  ashike oonshona dha piti omvula ompe, konima a li ta tyapula nokudhana omumvo omupe.

Omukuluntu gwopolisi moshitopolwa shaMusati Titus Shikongo okwa ti, oshiningwanima shoka osha holoka momukunda Oshilemba moshikandjohogololo shaTamanzi.
“Otaku hokololwa kutya omulumentu ngoka konima a li a mana okuumba mombanda iikuti onga enyanyanyu okuthika momumvo omupe, okwa shuna ondjembo mondjato yombulukweya.

Shikongo ta ti, okwa li adhimbwa okukutha ko iikuti oshowo okushuna ondjembo pehala.
Ta ti, oshikuti shimwe osha li sha nuka epuko e tashi mu yaha mokugulu kokolumoho. Okwa li a falwa a ka mone epango koshipangelo kOkahao, ta tuminwa koshipangelo oshinene shaShakati hoka natango a tuminwa koshipangelo shopawumwene Ongwediva Medi Park hoka a ka hulithila Olyomakaya ga zi ko.

Nakusa ngoka a li omuhingi gwomaloli mehangano lyiihulunde Fysal okwa tseyika nedhina Palus Natangwe Shaanika.
Oshiningwanima inaashi fathana, omulumentu gwomimvo dhopokati, ngoka a li e li muukongo okwa li a itsu momasipa gomuntu kohambo yedhina Omako moshitopolwa shaMusati.

Shikongo okwa ti, omasipa gwomuntu ngoka oga li ga itsuwa ethimbo lyongula Osoondaha ya ziko, ethimbo omunahambo kwa li takongo iimuna ye, ya kana.
“Omasipa ngoka oga li ookilomita tadhi tengenekwa 50, oku za pohambo yimwe ndjoka ya ningi oomvula mbali ya thigwapo,”Shikongo ta ti ngaaka.

Shikongo ta ti, ka pena uuyelele natango ngele omasipa ngoka oga gumwe kwa li ha zi mohambo ndjoka ya ningi ethimbo ya thigwapo. “Aakonakoni mboka ya li yathiki po, oya mono po ekolotse nomasipa gwomagulu oshowo iizalomwa, omakumbatha noongaku dha kulupila mevi. Opolisi oyi li metifa okukonakona omasipa ngoka,”Shikongo a popi ngaaka.

Ta ti omasipa otaga ulike ga ninga ethimbo kohi yevi nonando olupe otalu ulike kutya ogo muntu shili.
Okanonakadhona komimvo mbali oka si eso lyombaadhilila sho ka gwile mehela lyomeya momukunda Omukondo moshitopolwa shaMusati.
“Otaku hokololwa kutya okanona hoka oka li nokamwayina kadhona komimvo hetatu nayinakulu megumbo. Okamwayina kadhona oka li ka zipo kayi kelugo omanga yinakulu a li a kotha ethimbo oshingwanima sha holoka,”Shikongo a hokolola.
Shikongo ta ti, uunona mboka ohawu kala pamwe naakuluntu yawo koGrootfontein, no wa li weya kefudho kuyinakulu.