Omulumenhu weedula 39 omukwashiwana waAngola okwa kwatwa po eshi vati a denga nokulemaneka oshuunda shoikombo 36.
Otaku hokololwa kutya omufekelwa ou okwa kufa yoo vali oikombo ine omesho vati ei twa neembele.
Oikombo imwe oya teka omaulu, ya dinda komitwe omanga imwe oya dinda komilungu nehaamama da tekauka.
Oshiningwanima eshi osha ningwa Etitatu momukunda Okapika moshitukulwa shaMusati.
Oikombo aishe oi li pongushu yoshimaliwa N$57 000.
Omukulunhu wopolifi moshitukulwa shaMusati Commissioner Ismael Basson okwa hokolola ta ti omufekelwa oo e li omunailonga womeumbo okwa hanga oufita woikombo u li mepya tau li po omakunde.
Vati okudja opo okwe i shingila koshuunda ndele ta tameke oku i denga noikulumbwati komitwe nokomaulu.
Opolifi oya hokolola tai ti omufekelwa eshi a pulwa kutya omolwashike a denga oikombo, okwa nyamukula ta ti ota longo oikombo omikalo opo iha hetekele vali okuha lya mo omakunde mepya.
Omufekelwa ota holoka momhangu nena nota pangulilwa oshibofa shokuhepeka oinamwenyo.