Opolifi momErongo oya lopotelwa oshiningwanima omo omunambelewa woku tonatela omaliko, a umba noku monifa oshiponga omukwashiwana ehe na ondjo
Oshiningwanima eshi osha ningwa Osoondaxa efimbo lokeengulasha molukanda Mondesa moSwakopmund.
Omupopiliko wopolifi moshitukulwa Erongo Inspector Ileni Shapumba okwa hokolola ta ti nakuninga oshihakanwa omulumenhu womido 31, oo a li ashike ta piti ponhele opo a pa longele omukeleli womaliko. Naku yashwa vati okwa li ta lotoka.
Opo omukeleli womaliko vati eshi a mona omunhu ta piti ponhele yoilonga yaye ta lotoka okwa kufa ashike ondjebo ndele ta yashe omunhu mokuulu.
Vati omukeleli womaliko okwa li eshi pamwe omulumenhu oo oku na eshi a vaka ile pamwe e uya okuvaka ponhele opo.
Opolifi oya ti konima yefimbo omukeleli womaliko okwa kufa omulumenhu ndele te mu twala poshitaashi shopolifi opo a ka shivifile opolifi kutya okwe mu ya sha.
Nakuninga oshihakanwa okwa twalwa koshipangelo shepangelo shaSwakopomund opo a ka mone epango lopaunamiti. Opolifi oya hokolola tai ti nakuninga oshihakanwa okwa lekelwa mo moshipangelo efiku tuu olo. Vati nakuninga oshihakanwa okwa anya okupatululila omufekelwa oshibofa konima eshi a ka pulwa kopolifi. Omufekelwa ina kwatwa po natango shaashi kape na oshibofa sha patululwa.
Kapena etomeno kutya nakuninga oshihakanwa oshike okwa li ta faduka po eshi a mona omukeleli womaliko. Shapumba okwa kunghilila oovena ve na omahangano ovakeleli vomaliko opo va kale tava yandje omadeulo elixwapo kovakeleli vomaliko shaashi oshi nyika oshiponga ngeenge omukeleli womaliko okwa yashe omunhu ehe na sha ondjo.