New Era Newspaper

New Era Epaper
Icon Collap
...
Home / Aangola yamwe oya tinda okushuna

Aangola yamwe oya tinda okushuna

2021-05-27  Victoria Kaapanda

Aangola yamwe oya tinda okushuna

Nonando Aangola ya gongala miitopolwa Ohangwena nOmusati ya lombwela kepangelo lyawo ya shune koshilongo shawo, yamwe natango onkene taya tsikile oku iyakela moNamibia.

Kansela gwoshikandjohogololo shaRuacana Andreas Shintama okwa ti, omwaalu gwAangola otagu ende gu uka pombanda, nonando yaku magidhwa ya
shune kegumbo. Oshiwike sha zi ko Ngoloneya gwaCunene moAngola Gerdina Didalelwa okwa li a kumagidha Aangola mboka ya shune kegumbo oshoka itaya vulu okukala taye ya yambidhidha aluhe ye li koNamibia oshoka otaya longitha oshimaliwa oshindji shomahooli.

Ta ti, epangelo lyaAngola olyu uvite ko onkalo ya kala ya taalela ethimbo, ihe
pethimbo ndika olya thikama okuyambidhidha aakalimo yomoshilongo shalyo. Shintama ta ti, nonando yamwe oyiitala okushuna koshilongo shawo, opena yamwe mboka inaya hala okushuna oshoka oyiitala kutya otaya kasa ondjala. Manuel Daniel gumwe gwomwaamboka ya ngundumana pEtunda okwa ti, inaya hala okushuna koshilongo shawo oshoka sho a kala mekwatathano naakwanezimo ye mboka ye li koAngola oya ti natango oya taalela ondjala. “Ngame onda hala iilonga moNamibia opo ndi vule okufaalela aakwanezimo yandje iikulya. Epangelo lyetu ngele otali tu kwathele shili, nali kwathele manga mboka ye li koshilongo  opo tu itaale shoka taya popi,” ta popi ngaaka. Ta gwedha po ta ti, itashi kwatha sha tu shune koAngola omanga ku na ondjala. Shoka a hala iilonga opo a vule oku kakwathela aakwanezimo ye. Maria Dimungu ngoka a li a popi naKundana mongodhi okwa ti, ehalo lyokushuna koshilongo shawo oye li na, ashike oya tila ko ondjala.

“Katu uvite ombili tatu lala momapandaanda omanga twa thiga ko omagumbo getu, ihe shoka she tu tembudha oluhepo nondjala,” ta popi ngaaka.

Ta gwedha po ta ti, ethimbo alihe ya kala moNamibia oya kala taya mono omakwatho nokuyambidhidha nawa  kAanamibia shi vulithe sho ya kala taya mono iihuna moshilongo shawo. Dumingu okwati, itashi kwathele sha, taya ti naya shune ngele inaye shi tula miilonga natango, oshoka ngele oya shuna ihe natango koshilongo shawo okuna ondjala otaya galuka kako.

Aangola ye vule 1500 oyeli  moshitopolwa shaMusati omanga ye vule 500 yeli moshitopolwa shaHangwena. 


2021-05-27  Victoria Kaapanda

Share on social media