Windhoek – Mbunga vanakutmbura asi Anti Corruption Commission (ACC)kavatente asi awo yousili kuna kukona kona nombudi edi vavaretera dokutanta asi mukurona gositata saVenduka, Muezee Kazapua kwaruganesa siakarata sendi sopamberewa esi gagwana asi mukurona gositata omu garanda nyama, nonhunhwa koKFC, nondja ntani yikunwa eyi yina kara asi kwayiruganesa pwamwene kapisi paveta. Mukurona gombunga ezi Director Paulus Noa katente asi yousili vanamberewa vendi nare vanatameke kutarurura nombudi dangesi. Muntu gumwe kwareta marapoto aga, omu gayatanta asi mukurona godoropa ogu kwaruganesa sikarata sendi sopaveta mepuko, omu yawapera ngano kusiruganesa koyiviyauka yina kara asi yopaveta, yimo ngoso ana kutantera sayitunga zaNew Era. “ Sirugana setu kuna kara tupu mokutara asi yousili edi nombudi dousili ndi kapisi dousili. Ngesi sina kara nye sinka setu omu natutara asi dene edi nombudi dangesi usilimo ndi mwato. Ose simpe ntani tuna kutameka nomakonakono gangesi. New Era kamwene yimbapira yina kulikida asi Kazapua kwaranda yininke vana kupilira kudiva yina kulikida ngwendi ngesi, N$10 000 ko RMT (PTY) Ltd moNamibia momazuva 14 March mvhura zeezi.
Age simpe gakarende nyama kevango vana kutumbura asi Readi Bites Meat Market noymaliwa yinasiki ko N$4000 moyiruwo yokulisigasiga kutunda tupu mokwedi kwaSindimba mvhura zina puko. Mukurona gositata ogu simpe gakagusire yimaliwa kokasino, mbanga yimo ngoso zina kulikida. Kazapua katjangwilire nombudi dangoso asi kuna kumukwama kwama tupu morwa yeeyi siruwo sokuhorowora mukurona gositata sina siki. Age simpe katente asi sikarata oso kwasimupa asi ngano aruganeseko mokutekura vantu melinyanyukiso ava vana kuyamudingura paveta. Nokugwedako asi age kwaranda nyama ozo mokupa vantu vakurupe ntani vana kara asi woruhepo vatunga mositata saVenduka. Nye kapi kalikidire umbangi una kuliza noyo ana kuhuyunga yikare asi patjangwa. Oyo kuna kukwama kwamange tupu.
“Ono yidiva asi ngesi ntaantani tuze momahoroworo. Nsene tavatanta asi eruganeso epuko kwatameka mvhura zina puko, morwa sinke nye vana kuyireta siruwo esi? Sikarata oso mokusiruganesa kuna kara tupu momawoko gomukurona ,yimo ngoso ana kutanta. Age katente asi owo vana kureta nombudi odo kuna kara tupu negano lyokugusa evango lyendi, nye kapi vana kara noupolitika wokuyukilira. “Kwato yimaliwa eyi novhura kugwana asi oyi namemo nye veta kwakara asi wahepa kuruganesa tupu sikarata. “ Sikarata oso kapisi sokufuta konyima nsene ono mana kulya oyo kohepa, ndi asi ofute kupitira panangodi ndi asi nkenye omu. “ Kwatanta hena asi nsene topwaga noyirugana, sikara ono hara kuruganesa wahepa kugava komberewa zoyimaliwa omu ono kulikida asi kupi ono kuza siruwo sokuhura kupi ngokakarako, makura nayinye oyo wahepa kuyigava komberewa, ava navakara asi vahepa nye kutantera mbanga asi pwahakara eruganeso epuko sikarata oso ndi yimaliwa oyo.