New Era Newspaper

New Era Epaper
Icon Collap
...
Home / Babatibisizwe kimuunda bakupa tuso

Babatibisizwe kimuunda bakupa tuso

2023-01-30  Loide Jason

Babatibisizwe kimuunda bakupa tuso

Bayahi basilalanda sa Samora Machel bakupa katengo kamuleneñi waWindoko, kubatutiseza kokulumbile kasamulaho maino abona atibiswa kipula. Muyemeli Nestor Kalola naize batu babafitelela mwanda kuzwelela mwalikomponi zaHavana ni Goreangab, nebasinyehezwi kwamafelo aviki yefelile, kasamulaho mezi nabubezi mwamandu abona. “Mayemo ao kia silimo ni silimo. Mezi azwelela mwamulapo okwalilwe kimatakala. Katengo kamuleneñi nekasika kenisa mulapo wo mwalilimo zetalu zefelile, kacwalo baswanela kuto lutusa,” nekubulezi Hilma Nakandjembo ili yana sinyehezwi hahulu bakeñisa muunda.

Ndu yahae nesinyizwe kimezi mi libuka zamwanahae nizona neli kolobile, nalatehezwi cwalo mimbeta yemibeli, likabati, fulinji ni munshini ufutumaza lico. “Kalitohonolo hakuna yanali mwandu. Nekaba sinyehelo, nihaike isali sinyehelo. Mezi neli amañata hahulu,” nabulezi. Kanako yacwale utibelezi mwandu yeli mabapa ni yahae, alibelezi tuso kuzwelela kwakatengo kakabona zalisinyehelo mwasikiliti sa Khomas. Muyahi yomuñwi Natanael Emweudjala, naize katengo kamuleneñi waWindoko haiba inge kasakenisi mulapo kapilipili lisinyehelo zeñata lika ezahala kwapili.

Muyemeli Kalola nabulezi Lasunda viki yefelile kuli buñata nebatibezwi mi niyena nanyaza katengo kamuleneñi waWindoko. “Babeleki bakatengo kamuleneñi waWindoko habatahi kuto eza musebezi wabona. Mulapo hausika keniswa mwalilimo zetalu zefelile, kona hakuna ni butata bo. Halu babulelela kuli batutise batu, hakuna zeba eza. Batu habatimela kiluna babaka nyaziwa,” nabulezi kabunyemi.  Muzamaisi wakatengo kasikiliti sa Khomas, Clement Mafwila nalumezi kuli katengo kasikiliti kaziba muunda, mi naekelize kuli batusize sicaba. “Lubafile lico, likubo ni matente, halusa libelezi piho kakutala kuzwelela kwaofesi yasilalanda,” nekubulezi Mafwila.


2023-01-30  Loide Jason

Share on social media