• December 19th, 2018
Login / Register

Babeleki bakatengo katolopo ya Katima bacaula


KATIMA MULILO – Babeleki bakatengo katolopo ya Katima Mulilo, babonisize kuli habana kusebeza kukala kachenu, kasamulaho akupalelwa kufita fatumelelano hala kekezo ya 9 pesenti. Ba New Era nebabulelezwi kuli Katengo Katolopo nekasatabeli kufa kekezo kwa bababeleki bakona, kono kasamulaho wakusundwa kikatengo kaka yemela babeleki ka Napwu, sebaba tambeka 5 pesenti ili yene bahanile babeleki. Muongaongi wakatengo ka Napwu mwa sikiliti sa Zambezi, Prisca Makabi nanitifalize kuba New Era kuli baka caula, mi naize babeleki neba botezi sitiraka kasamulaho akupalelwa kufita fatumelelano nikamaiso yakatengo katolopo. “Sitiraka sikaba teñi Lamubulo la 03 Ñulule (kachenu), mi luse lufile kale temuso, batu kaufela baka caula kakuli kitaba yene botezwi kale,” nekubulezi Makabi.

Hana kupilwe ku alabela fakalulo yeo, Muzamaisi swalelele wakatengo katolopo ya Katima Mulilo, Charlie Ntema nanitifalize kuli naziba kubateñi kwa sitiraka. “Ni amuhezi temuso yeo kuamana ni sitiraka kuzwelela kwa katengo kakayemela babeleki, mi nika ikabela yona ni Muyemeli wa tolopo,” nabulezi. Ba New Era neba zibisizwe hape kuli babeleki babilaela kamayemo maswe kwamusebezi. “Babeleki babasebeleza kwanda ofesi habaezi misebezi yabona, baya feela kwamusebezi kuyo ina feela, kakuli limotikala kaufela halisebezi, mi hakuna masheleñi akuyo lipangisa,” paki nabulelezi ba New Era. Kwamakalo aviki yefelile, tolopo kaufela ya Katima Mulilo nesina mezi kakuli katengo katolopo nekasina mali akuyoleka mezi kwa kampani yelekisa mezi ya NamWater. Nebakonile kufumana N$200 000, mi nebailo leka mezi Labubeli, ili awo lipaki libulela kuli akaswana apalelwa kufeza viki. Zeo halili cwalo katengo katolopo kasana ni sikoloti sesifitele bolule ba 19, kwa kampani ya NamWater ili taba yetisanga kuli fokuñwi baba kwalele mezi. 

Kukwalwa kwa mezi kubonahala kuli kukaswana kulimba bana basikiliti sa Zambezi, baba belekela kwanda sikiliti, baba lela kupotela sikiliti mwapumulo. “Katengo katolopo hakana masheleñi, mwalibulukelo kaufela kikale ku oma, mi kanako yacwale baseza mokusina,” paki yesepahala nebulelezi ba New Era. Hala zeñwi babanyaza balimba taba yakuitekela mezi, kuli baba isebelisa seba tepelela kulifela lisebelezo zeñwi. Taba yakufa lipeleko kamafosisa niyona ibapala kalulo yateñi, kakuli seli likweli zepeli kusina baba olela masila, kasamulalo katengo kakatalima sinca lipeleko nekayemisize peleko yaku olela masila. Kucaula kwa babeleki hakuna feela kunyanganyisa katengo katolopo kakase kasina masheleñi, kono kuka utwiwa nibayahi batolopo ya Katima Mulilo, kakuli nilisebelezo zeñwi zaputako zeswanasina zabatimisi bamulilo nizona halina kubateñi. Mi buñata bwa bayahi batolopo babaitekela mezi nibona habana kukona kueza cwalo.
 


Aron Mushaukwa
2018-12-03 09:59:36 15 days ago

Be the first to post a comment...

You might also like...