KATIMA MULILO – Kuzusuluswa kwasibaka sabupoti nimaikatulusezo sesiyahezwi kwa mukulela wanuka, ili sezibahala ka Zambezi Waterfront and Tourism Park (ZWTP) kusiala mwasimbwi sina mosiinezi lilimo zetalu zefelile kasamulaho akukwaliwa swalelele kimuuso kulatelela likakalezo zakamaiso yabulyangelino. Babeleki balishumi kabasupile bane bakutisizwe kuli bababalelo miyaho, kulatelela kukwaliwa kwapurojekiti yabupoti yetuna mwasikiliti sa Zambezi ili kalulo yene siile babeleki bababato eza mashumi asilezi basina misebezi, babilaela kuli sekufitile likweli zepeli basafumani lituwelo zabona. Babeleki bane babulezi ni mubihi yo nebaize bafumananga lituwelo zabona kala 25 kweli nikweli kono likweli zefelile hakuna sebafumani, mi hababuza kwabazamaisi babona hakuna likalabo. “Lukakona cwañi kutusa kubabalela miyaho haiba halufumani lituwelo zaluna? Lutabela kubeleka kono lutokwa kulifiwa kakuli luna ni mabasi aluswanela kufepa,” nekubulezi yomuñwi wababeleki babali mwaziezi.

Mubihi yo uutwisa kuli babeleki ba 17 nebakutisizwe hala tumelelano yalikweli zesilezi yekona kuekezwa, mi liswanelo zeñwi zecwale kalitifo zañambekelo, masheleñi akupumula famusebezi ni akulifela likalo nelizusizwe. Kono tumelelano yamafelelezo yene banyatezi nefelile mwakweli ya Yowa 2018, mi kutisa cwale haisika cafazwa kale. Mi babeleki babeleka bali mwasabo yakuli bakona kulatehelwa musebezi nako ifi kamaba ifi. Babulela kuli banze bafumana tuwelo yeswana mi hakusikaba nikekezo mwalilimo zetalu zefelile.

Kanako yakukwalwa muuso noso sinyehezwi mali alikana bolule bamianda yemibeli, hala kutisa zwelopili ili mone kuna nikenisa sibaka, kulela, kuyepa mingelo, kuyaha miyaho, hala teñi litungu ze 15, muyaho wakamaiso, hala mubu olikana lihekele zemashumi amabeli kazepeli kwamukulela wanuka ya Lyambai.

Musulo wamafelelezo wa ZWTP neli olikana bolule bamashumi amabeli kasilimo sa 2015/2016, mi mubihi yo nabulelezwi kuli kalulo yateñi nena nikusebeliswa kubabalela miyaho, kono mali awo abiwa kuli safelile. 
Mubihi yo nabulelezwi hape kuli mali amafelelezo liluko nelifile ZWTP nalikana N$100 000, mi babeleki nebaize mali awo nakona feela kulifa lituwelo zabona zakweli hakusa balwi lisebelezo zeñwi. Hana kupilwe kualabela balitaba zewo muinasipula wa ZWTP Esther Kali nakashelize lipuzo kaufela kwaliluko la Silalanda ni Bupoti, ili mushemi wateñi. Hana kupilwe kualabela fateñi sibuabui waliluko Romeo Muyunda naize liluko liziba taba yeo mi linze lisebeza katata kulika kufumana tatululo. “Nelu amuhezi kupo kuzwelela kwakamaiso yasibaka sale kweli yefelile. Mi lusweli kulika kutalima taba yeo kakuli kanako ye haluna mali ane akupilwe, lusweli kutalima kokuñwi kolukona kuafumana kuli lubafe. Isi feela kuli kulifwe lituwelo kono nilisebelezo zeñwi cwalo,” nabulezi. Nabulezi hape kuli liluko liutwisisa “sililo sababeleki mi linze lisebeza katata kubona kuli sililo sabona satakulwa.” Muyunda nalumela kuli masheleñi akaswana afumaneha viki ye.