KATIMA MULILO  - Baleki ba mwamakululu nebakile bacaula mwatolopo ya Katima Mulilo ili teñi nebafitisize lipilaelo zabona kwaliluko lelibona zamabasi nikuzwa nikukena mwanaha, nikwa katengo katolopo ya Katima Mulilo, kuli balundule balekisi ba mazwahule.  Balekisi ba mwamakululu kaketelelo ya katengo ka Native Small Traders Association (Natsa), nebabulezi mwaliñolo labona lalipilaelo kuli “bakatazwa hahulu kimazwahule babaitengile mwalipisinisi zamwamakululu,” mwa tolopo ya Katima Mulilo.

Babulela kuli kuekezeha kwa balekisi ba mwamakululu kuzwelela linaha za Zambia ni Botswana, kufofaza kekezo yebaswanela kufumana, mi hape kuba tima libaka zakulekiseza. “Balekisi ba mwamakululu bamazwahule baswanezi kulundulwa, kakuli bayangwela lico mwamazoho abayahi tota, mi hakuna sebakutiseza kwasifumu sanaha. Libaka zamalekisezo mwanaha Namibia lina nikuba zabayahi banaha Namibia, kakuli lipisinisi zamwamakululu kimapilelo ababañata mi halitokwi yaitutile,” nekubaleha liñolo labona la linonge.

Neba akaleza hape kuli balekisi ba mwamakululu kuzwelela naha ya Zambia ni Zimbabwe balekisa libyana zambwashula, ili zesika lumelelwa kaliteko zepahami hahulu, basina nihaike mañolo abalumelela kulekisa. “Lutokwa liñolo la kubalundula kuzwelela kwa liluko lelibona zalitekisano nikuhula kwalipisinisinyana,” nebabulezi. Neba bilaezi hape kuli balipisini zalintolo mwa Katima Mulilo habaezi hande balekisi ba mwamakululu mi baba lelekanga mwamalibela alintolo zabona. Neba kupile kuli balintolo bao, “balumelele balekisi kulekiseza mwamalibela abona, kapa bakute kobayozwa.”