Lubasi kuzwelela naha Germany ni mufufisi kuzwelela naha South Africa, neba zibahalizwe kimapokola kuba bane batimezi mwakuwa kwafulai mwasioli sa Impalila musihali waLabubeli. Nebazibahalizwe kuba Thomas Rings (59), mufumahali wahae Evelyn Rings (57), banababona babasizana Alicia Maria Rings (19) ni Lucia Rings (17). Mufufisi nazibahalizwe kuba Nicole Minnie. Macaziba ni babatisisi nebaitekezwi kuya kwasibaka sa kezahalelo mwasioli sa Impalila mwasikiliti sa Zambezi, kuyo batisisa nikufumana kuli sene sitisize kozi yeo kisikamañi.

Fulai yeluilwe kikampani yakwamukunda yamufuta waCessna 210, newile mwambyumbyulu kanako ya 13h15 Labubeli, nikubulaya batu baketalizoho bane bali mwateñi. Mapokola babulela kuli fulai nelibile kwa Rundu kono yawa nakonyana feela imano nanuha. Lipatisiso zacwale libonisa kuli kasamulaho akunanuha kwalibala la Impalila, fulai yawela kwamukulela wanuka ya Lyambai mabapa ni munzi waba Muwana. Yomuhulu mwaofesi yebona zakubatisisa likozi zalifulai, Magnus Abraham nabulelezi New Era kuli zene ezahezi luli halisika zibahala kale kabutungi.