KATIMA MULILO – Baana babalalu babakulubelwa kuli ki bazumi baba zuma isi kamulao nebahanezwi kulifa masheleñi, akupikela tolongo kwande hane babonahalile fapila muatuli yomunyinyani Boyd Namushinga, mwa khuta ya Katima Mulilo, Labulalu. Kaufela batalimani ni milatu ye milalu ya kuzuma lifolofolo zesilelelizwe, basina mañolo aba lumelela kueza cwalo, kufumanwa ni kubulaya lifolofolo zanaheñi, hamoho cwalo nikulonga nama ya zanaheñi basina mañolo. Bana banaha Namibia bababeli ni wanaha Zambia nebatamilwe kwa Masokotwani kamapakela kakusasa Labubeli, kanako ya 03h00. Kasamulaho teelwa katwa kibasilelezi balifolofolo bababeli. 

Bazibahalizwe kuba Simasiku Sibanga walilimo zemashumi asilezi, Simataa Simasiku walilimo zemashumi aketalizoho ka amane, ni muyahi wanaha Zambia Dereck Simunji walilimo ze mashumi amalalu ka ze lobapeli. Nebafumanwi ni nama ya mitobo yemilalu, ni tuputi totubeli, mwa motikala yamufuta wa toyota yekwaluhile, yanombolo N 1913 KM, ili yese ikwalezwi kanako yacwale. Kuekeza fo, nebafumanwi ni tobolo yena ni liñolo ni malumo a mashumi amane ka alobañwi, ili yeo kulumelwa kuli kona yene isebelisizwe kueza mafosisa. Mwaponahalo yabona yapili mwa khuta, bulalu bwa bona nebaize bakaikemela bona beñi, nebabulelezi hape khuta kuli bakaitumelela mafosisa kwa milatu kaufela yebatalimani niyona. Muzeko noisizwe la 31 Yenda, kulumelela lipatisiso kuli lizwelepili.