• January 20th, 2019
Login / Register

Bukamuso bwasibaka samafitelo mwa Zambezi bumwasimbwi



KATIMA MULILO – Kalulo yakuzusulusa misebezi kwasibaka samafitelo sesiluwilwe kimuuso ili sesizibahala ka Zambezi Waterfront isiyala mwasimbwi sina mone inezi nako yeo muuso haukwala sibaka saale swalelele lilimo zepeli zefelile, kasamulaho walikakalezo zakamaiso yabulengwami. Kukwaliwa kwateñi nekusiile batu bababato eza bamashumi asilezi basina musebezi, mi balishumi kabasupile feela kibane bakutiselizwe famusezi kalikweli zesilezi ze ekezwa kuli bababalele sibaka saale. Ba New Era ba utwisisa kuli liswanelo zaba beleki zeñwi zene bafiwanga zeswanasina mali akufumana habasiya musebezi nimali alifiwa habaya kwalikalafo neliyemisizwe. 

Ba New Era neba  zibisizwe hape kuli mampampili abona amusebezi ane banyatezi nafelile mwa kweli ya Yowa mi kanako yacwale basweli kusebeza mwasabo yakuli bakona kusiswa musebezi nako ifi kamba ifi. Kanako yakukwala muuso nese usulile mali afitelela bolule bamyanda yemibeli mwa kalulo yapili ili yenengelezi nikukenisa sibaka sakuyahela, kuyepa mingelo, kuyaha muyaho wakamaiso nikuyaha mandu akufitela alishumi ka aketalizoho, libaka zamatibelelo, muyaho waku ezeza mikopano ni libaka zakuikatuluseza, hala mubu walihekele zemashumi amabeli ka zepeli. Sibaka sakuikatuluseza sesifetuha matota kakuli haisi bababaleli bamiyaho kona babafumaneha teñi. Miyaho yeñwi sihulu mandu amalobalo sasweli kusupala bakeñisa kutokwa pabalelo. Miyaho hape sepotolohilwe kimacacani mi kulumelwa kuli linoha selisweli kuzwalela mwateñi. 

Liluko la Pabalelo ya Zanaheñi ni Bupoti lisweli kufa musebezi wakamaiso swalelele mwalikweli zesilezi, kono kuzwelela fo muzamaisi wamafelelezo nasiile musebezi Connie Situmbeko kweli yefelile kasamulaho pampili yahae yakusebeza haifita kwamafelo, situlo hasina mutu. Kulika kufumana tatululo kuamana nibukamuso bwa sibaka samafilelo kwaliluko la bupoti ni pabalelo ya zanaheñi nekupalile, kakuli sibuabui wa liluko Romeo Muyunda kanako yakuhatisa nasika alabala kale lipuzo zene alumezwi. Kono mwalingambolo Muyunda naize sibaka samafitelo sina ni mikwangalakañi yeta kona kunga nako yetelele kuitatulula. “Kuna nilika zeñata kulo kwani. Kuna nitaba yatuwo yasibaka, kuna nitaba kamo miyaho neyahezwi, kuna nitaba yakamaiso yabulengwami bwa masheleñi yesatokwa kubatisiswa, kuna ni litaba zeñata,” nekubulezi Muyunda.
 


Aron Mushaukwa
2018-11-19 10:03:58 2 months ago

Be the first to post a comment...

You might also like...