Ominista youhaku, onghalonawa Dr. Kalumbi Shangula ota ti omuvalu wovanhu tava kwatwa kombuto yoCovid-19 owa londa nomafyo okwa didilikwa a yuka pombada neenghono.

Onghela Namibia okwa li e na ovanhu ve fike po51 390 va  kwatwa kombuto yoCovid-19, omanga ava va fya ova ve li 723. Shangula okwa ti oCovid-19 omukifi wa nyika oshiponga neenghono, onghee okwa kunghulila oshiwana opo shi twikile noku liufa komilandu edi da tulwa po kouministeli wouhaku.

“Onda didilika kutya oshiwana itashi lihumbata nawa omafiku aa unene tuu peenhele domangudumano oha pakala pe na ovanhu ve li momivalu dinene neenghono,” Shangula ta ti.

Minista okwa denga omufindo ta ti oshiwana nashi xulife po okukala tashi tandavelifa ouyelele wa puka kombinga yombuto yoCovid-19.

“Kukeshe ou ta ka tandavelifa ouyelele woipupulu kombinga yoCovid-19 ota ka pewa ehandukilo leedula 10 modolongo ile ta pewa a fute oshimaliwa shehandukilo shi fike N$100 000,” Minista ta ti. Shangula okwa ti ovanhu nava twikile nokula tave li twimikile, tava ndjala oumaska opo ve liamene, nokulikosha keenyala nofewa.

Minista okwa pandula ovanashilonga voundjolowele eshi tava twikile nokulonga nelitulemo unene tuu komandiki ouhaku apa tapa vendelwa oshiwana. Okwa ti ope na omalandulafano mawa unene, onghee okwa pandula ovanashilonga wouhaku aveshe.

“Ohandi kunghulile oshiwana opo shi twikile nokukala tashi i ketunhilo lovenda yoCovid19 opo shi kale sha amenwa kombuto,”. Shangula tat ti.