New Era Newspaper

New Era Epaper
Icon Collap
...
Home / Covid-19 ya shunifa oyuuyemo pedu yoshikondo shomatalelepo

Covid-19 ya shunifa oyuuyemo pedu yoshikondo shomatalelepo

2021-06-29  Festus Hamalwa

Covid-19 ya shunifa oyuuyemo pedu yoshikondo shomatalelepo

Oshikondo shomatalelepo moNamibia osha dengwa pomutima kombuto yo Covid-19 eshi oyuuyemo ya shuna pedu neenghono.

Meenghundafana a ninga naKundana omupopiliko mouminsteli womidingonoko, nomatalelepo Romeo Muyunda okwa hokolola ta ti oshikondo shomatalelepo oshi li meshongo lopomashimaliwa paife shaashi omukifi wa denga neenghono moshilongo owa kufa po oilonga yavahapu.

Muyunda okwa hokolola ta ti pefimbo eli lombuto yoCovid-19 ya tukuka mounyuni oya kuma oshikondo shomatalelepo mounyuni aushe, omo omatalelepo a xulifwa po mopaife shaashi omukifi ou owa nyika oshiponga neenghono.

“Ovanhu vahapu ova kanifa oilonga yavo, unene tuu oshitukulwa shErongo osho shimwe shi na omwaalu wovanhu vahapu va kanifa oilonga yavo pefimbo eli lomatalelepo a xulifwa po moshilongo. Onghee paife ovanhu vamwe oveli moluhepo shaashi ka ve na vali oyuuyemo ya sha,” Muyunda ta ti.

Okwa yelifa ta ti oshikondo shomatalelepo osho shimwe hashi eta oshimaliwa shihapu moshilongo, nohashi yambula po eliko loshilongo shaNamibia.

“Oifuta yokongulu nayo oya shuna pedu shaashi eengeshefa dihapu ngaashi eenhele dokukala ovatalelipo oda pata paife, onghee eengeshefa edi ihadi futu vali otax,” Muyunda ta ti.

Okwa weda po ta ti epangelo nalo ola kumwa kombuto ei shaashi ola kanifa oshimaliwa shihapu nalo, onghee okwa ti epangelo ihali mono vali oshimaliwa tashi di koshikondo shomatalelepo.

“Ngeenge onghalo yombuto yoCovid-19 oya shuna kouwa, noilonga yoshikondo shomatalelepo nayo otai ka tameka. Onghee paife natu twikile a shike oku li ufa komilandu da tulwa po doku keelela oCovid,” Muyunda ta ti.


2021-06-29  Festus Hamalwa

Share on social media