Oongoloneya monooli yiitopolwa ya yooloka oya londodha oshigwana shi li momahala haga kala omeya shi tembuke kuyele, omanga omeya inaaga yonagula iinima yawo oshowo okufaalela oomwenyo.
Omunambelewa omukuluntu gwiikwameya mehangano eyandjakaneki lyomeya moshilongo Leonard Hango okwa fatulula kutya efundja olya ziilile koAngola sho omeya gwomvula onene ndjoka ya loko moAngola ogo ga li ga udhitha omulonga omunene gwaCuvelai ngoka ga piti sigo okoongamba.
“Omeya gomvula onene ya loko moAngola, ogo ga piti oku za komilonga dhoka moAngola sigo ga udha oondama dhoka dhili ndatu. Sigo omuundama uushona mboka wu li poongamba dhaNamibia naAngola,” ta ti ngaaka.
Hango ta ti poongamba mpoka opo nduno pwa zi iishana mbyoka hayi endele omeya gefundja miitopolwa ya yoloka moNamibia, ngoka haga ka tsakanena momulonga gwaOkuma sigo Etosha pan, ngoka ga kaya sigo okoAntantic ocean.
Agwedhapo ta ti oshiwike sha ziko sho omeya kwali ga lopotwa moAngola, ogali ga thiki moNamibia Etitano lyaziko. “Mehuulilo shiwike okwali kwazi ekuthikuthi enene, ndyoka kwali lya thiki moshitopolwa shaHangwena tango nokuudha iishana oshowo okutetako oondjila dhilwe,” ta ti ngaaka.
Hango ta ti otaya kala taya tseyithile oshigwana shoka tashi holoka po.
Ngoloneya gwoshitopolwa shaHangwena Walde Ndevashiya okwati oondjila ndhimwe hadhi endwa odha tetwako komeya ngoka guudha miishana. Ta ti omeya oga ponokele omikunda ngaashi Onghala, Oimbadalunga, Eeshoke, Ohaingu, oshowoEngela. “Otatu kumagidha aakalimo mboka yeli momahala haga ende efundja shito opo ya tembukile komahala kwalonda omanga kuyele,” ta ti ngaaka.
Ta ti oshigwana inashi tegelela sigo kwa toko opo shi tembuke.
Ngoloneya gwoshitopolwa shaMusati Erginus Endjala okwati sigo esiku ndyoka kwali taya popi noshifokundaneki shika, inaya lopotelwa efundja momindhingoloko dhawo.
“Ihe ngele omeya oga thika moHangwena itashi shiwa ga kale inaaga thika moshitopolwa shaMusati,” ta popi ngaaka. Okwa kumagidha oshigwana shi kale uupathi oshowo okutembukila komahala galwe okuyanda ekanitho lyoomwenyo oshowo iinima yawo.
Ngoloneya gwoshitopolwa shaShakati Elia Irimari okwati oya ilongekodha kehe shoka tashi yapo ombaandhilila.
“Otuna iikwathithi yoku tembudha aakalimo haya ningi iihakanwa yEfundja, okuya tembudhila komahala galwe,” ta ti ngaaka. Ta ti, Efundja uunene ohali halakanitha olukanda Oshoopala mOshakati. Ta gwedhapo ta ti oya kala noku kundathana nelelo lyondoolopa yaShakati nkene yena okuhulithapo uupyakandhi wEfundja.
“Omeya ngoka ohaga etelele omayoka niilikama yimwe yiili onkene otatu indile oshigwana shi kale sha kotoka,” ta kumagidha ngaaaka.
Okwa indile wo natango aakalimo mboka yeli pomahala haga adhika kEfundja ya tembukile komahala galonda omanga ku yele.
– vkaapanda@nepc.com,na