Omunawino gwomeya omukuluntu muuministeli wuunamapya, omeya niikwamavi Leonard Hango okwa koleke kutya omeya gefundja oga thika moshitopolwa shaShana.
“Nena inandi enda ko, ashike mpoka kwali twe ga thigi konima yomuloka omwaanawa monooli, oge na okukala heli moshikandjohogololo shaNgwediva,” ta ti ngaaka.
Hango okwa ti sigo ompaka inaya lopotelwa omeya ga yonagula sha moshitopolwa shaShana.
Efundja olya thiki moNamibia iiwike iyali ya piti, okuza moAngola, sho kwali kwa lokwa omvula onene.
Nonando oshitopolwa shaShana anuwa osha ilongekindhila efundja ndyoka lya popiwa iiwike iyali ya piti, oshigwana otashi kumagidhwa shi kale uupathi, unene momalukanda ngoka haga ningi iihakanwa yomeya gefundja.
Oshiwike sha zi ko, Ngoloneya goshitopolwa shaShana Elia Irimari okwa ti, oya ilongekidhila omeya gefundja ethimbo alihe.
“Uuna omeya ngoka gathiki momalukanda moka haga ponokelwa komeya, otuna nale ehala mpoka ta tu fala aantu oshowo ootenda moka ta tu ya tula,” ta popi ngaaka.
Ta gwedha po ta ti, nonando omeya gefundja unene mOshakati ohaga ponokele olukanda Oshoopala, elelo lyondoolopa lyaShakati olya kala noku kambandhala okuyapo noonkambandhala opo omeya ga kungulukile melambo limwe gaye guukilila, go kaaga kungulukile momalukanda.
“Ota tu indile oshigwana shi ikaleke ko kule noku nwa oshowo okulongitha okuteleka nomeya ngoka inaaga opalekwa, oshoka ogena oombahiteli no taga vulu oku etele oshigwana omikithi dhilwe,” ta kumagidha ngaaka.
Irimari natango okwa kumagidha oshigwana shiikaleke kokule nokuya momeya moka oshoka oga etelela iilikama oyindji, ngaashi omayoka niikwawo oyindji.
Tagwedha po ta ti, oshitopolwa shaShana osha kala nokukundathana shoka shina okuningwapo okuhulithapo uupyakandhi hau etwa kefundja moondolopa yaShakati, unene momalukanda.
“Sigo ompaka elelo lyondoolopa inali galukilandje kutya lyahuulilepeni,” ta yelitha ngaaka.
Pethimbo oshifo shika kwali shaka nyanyangindhwa, omukuluntu gwelelo lyondoolopa Timoteus Namwandi, okwa li metifa okuyamukula kutya elelo lyondoolopa olya longo po shika okukandulapo uupyakandi hau etwa kefundja mondoolopa yaShakati.
- vkaapanda@nepc.com.na