Mehuliloshiwike lya zi ko aakalimo yomoshitopolwa sha//Kharas unene tuu pomahala ge li popepi noRosh Pinah okwa li ya kwatwa kuumbanda sho evi lya kakama.
Ekakamo lyevi olyo endwafuko lyoonkondo ndhoka hadhi etitha omakakamo nenge einyengo lyevi.
Kombanda yevi, ekakamo lyevi ohali imonikila pakwiinyengitha evi nopoompito dhimwe, okundwafuka kwevi.
Oshikwawo ekakamo lyevi ngele enene ohali vulu okweetela evi lyi tende omisa iminene ndhoka hadhi eta opo omatungo ga teke po, oopate dhi hanauke po nokudhipaga wo aantu oyendji poshikando.
Uuministeli wiikwamina niikwankondo owa pititha omushangwa kutya ekakama lyevi olya holoka ookilometa 184 okuya muuzilo woLuderitz, ookilometa ashike 41 muuninginino woRosh Pinah.
“Aakalimo oya londodhwa ya kale ye li uupathi oshowo ya kotokela mpoka taya ende, nonando kape na oshiponga sha holoka pethimbo ndyoka,’’ uuministeli wa kumagidha ngaaka. Uuministeli owa ti ekakamo lyevi okwa li lya ndhindhilikwa tali lopota kiitayi yi na omashina gokulopota ekakamo lyevi, lyoNamibian Seismology Network, koWindhoek, Kamanjab, Karibib, Ariamsvlei oshowo koAus.
“Ekakamo lyevi okwa li lya yi uule wookilometa tadhi tengenekwa dhi thike po15,” wa ti ngaaka. Ekakamo lyevi natango okwa li lya holoka omimvo dha piti moNamibia, shoka hasho oshikando shotango.
Okwa lopotwa ekakamo lyevi omimvo dha piti kwa li lya dhenge omudhingoloko gwaMaruru moshitopolwa Erongo, ndyoka kwa li lya ningwa muule woowili inaadhi konda pumbali.
Ekakamo lyevi lyotango ndyoka lyondjundo 5.6 pashiyelekitho shoRichter olya holokele potundi 15H50 lwaampoka konyala ookilometa 50 muuzilo wondoolopa Omaruru, pauyelele wOshikondo shOmapekapeko giikwamamanya. Omunambelewa omukuluntu e na sha niikwamamanya, Manfred Muundjua, pethimbo ndyoka okwa li a kundaneke miikundaneki ya yooloka kutya ekakamo lyevi olya ningwa kohi yevi ookilometa 10.
Omakwatathano gopautekenika ge na sha nomakakamo gevi natango piitaasi poAus, Ariamsvlei, Windhoek, Kamanjab, Tsumeb noRundu oga lopota ekakamo lyevi ndyoka. Muundjua okwa li apopi ta ti ekakamo lyevi lyondjundo nenge uunene woshiyelekitho 5.6 okwa li tali etitha eitulomo enene mokati kaanambelewa ye na sha nuudhindoli womakakamo gevi, unene oku shi talela miiningwanima ya faathana monakuyiwa moshitopolwa shoka kutya otamu vulu nani okuholoka omakakamo gevi ga faathana.
Ekakamo lyevi etiyali okwa li lya holokele wo mOmaruru potundi 17H00 lwaampoka.
"Ndika kalya li lya dhiginina unene ngaashi ndyoka lyotango," omunambelewa osho a li a popi ngaaka. Naampoka kapwa li pwa lopotwa iiponga nenge eyonagulo lyasha.
Onkalo yomakakamo gevi moNamibia oya kala ya ngungumana okuza momumvo 1910 sigo okeluwa ndika, noshilongo inashi kala nokulopota ekakamo lyevi enene muule wethimbo ndyoka.
Iitopolwa mbyoka yi na omashina gokulopota omainyengo gekakamo lyevi oga li ga lopota oshiningwanima shoka kOpuwo, Windhoek, Waterberg, Khorixas noBethanie.
vkaapanda@nepc.com.na