Ounona novakainhu vahapu moshitukulwa shaShikoto onghee tava twikile okuninga oihakanwa yekwatonghonga ashike ihapu yomoibofa oyo ihai lopotwa.
Oibofa ihapu oyo hai kala inai lopotwa oyo yo younona va iwa navo moixulo keenghono ngee kovampambele ile kovashiinda, oshinima osho hashi kala sha talwa ko onga oshififahoni.
Shimwe vali, eenhele dimwe odi li koushai unene naluhapu ovadali vokaana oko ka ningilwa oshiima ohava kala ve na oudjuu wokufika kopolifi. Kansela waKankalo Hansa Nambondi okwa ti onghalo yoitaashi yopolifi i li kokule, eendjila dii noshoyo okuahe na ouyelele osho unene hashi etifa oibofa yomakwatonghonga i kale itai lopotwa pefimbo ngeenge ya ningwa momikunda.
“Moshikandjohoololo shetu omu na ovanhu ve li kokule noitaashi yopolifi omanga ovanhu vamwe kave na ouyelele kutya otava lopota peni ngeenge va ningilwa ominyonena dopaixulo,” kansela Nambondi ta ti. Kansela woshikandjohoololo shaNehale lyaMpingana Joseph Shilongo naye okwa koleka ta ti ombelewa yaye oya didilika nokumona eelopota kombinga yovadali vehe hole okulopota ngeenge omupambale a kwatwa okaana onghonga.
Shilongo okwa ti eshi otashi xwaxwake onghalo younona va kale tava kwatwa onghonga ngeenge ovanhu itava lopotwa.
K o m u f a l a w o p o l i f i moshitukulwa shaShikoto Commissioner Teopoline Kalompo-Nashikaku okwa opolifi ohai kala ya taalela eshongo linene l o i b o f a yomakwatonghonga hai kala tai lopotwa kwa lata onghee eshi ohashi kala shidjuu kopolifi opo i dule okukala ya ninga omakonakono omondjila.
Nashikaku okwa ti ku keshe omudali ta ka hangika e na okaana kaye ka kwatwa onghonga ndele okwa dopa okulopotela opolifi pefimbo naye ota ka kala a patululilwa oshibofa.
“Ovadali nava xulife po okuamena ovapambelele vavo ngeenge va kwatwa ounona onghonga. Omunhu keshe a kwata onghonga okaana na kale a lopotwa pefimbo opo opolifi i kale ya ninga omakonakono omondjila,” ta ti. Unene tuu ngeenge omufekelwa hadi meumbo limwe na nakuninga oshihakanwa oha shi kale shi djuu komudali opo a kale a lopotela opolifi ile ofikola shaashi vati ihava kala va hala omufekelwa a kwatwe po shaashi oye a yambidida meumbo.
Umwe womuhongifikola moshitukulwa shaShikoto okwa ti luhapu oibofa ei oha i ya kombada ngeenge omuhongifikola a didilike omunafikola e na omaliumbato taa limbilike.
Ovahongi ohava ningi nee omapulapulo, osho hashi eta opo okaana ka popye kutya oka ningilwa omunyonena wopaixulo komupambele wonhumba ashike va ti ina okwa anya oshikumungu eshi shi lopotwe.
O m u d o w a d j a k o m o s h i k a n d j o h o o l o l o shaKongo omwa lopotwa okaana keedula 13 ka xulifa konima eshi ka katwa komukifi taku tengenekwa wa tandavelifwa pixulo molwashi ka kala haka kwatwa onghonga kuxe. Ina vati nande a kala eshi oshinima osho ine shi lopota.
Eshi tashi nyemateke osheshi kutya omufekelwa oo kali a katukilwa onghatu.
O u k a d o n a v a v a l i , omukulunhu nodenge yeedula 12 hava di meumbo limwe moshitukulwa shaMusati navo ova kwatwa onghonga noku pewa omateelelo kumumwainamati hava di meumbo limwe lavo ashike ovadali inava lopota oshibofa eshi pefimbo. Okaana keedula 12 nako oka pewa eteelelo kumushiinda omanga okaana keedula 14 nako oka pewa eetelelo kumushiinda moWindhoek ashike oibofa ei oya lopotwa kwa lata eshi oonakuninga oihakanwa va ka monika ve na omateelelo. Kansela woshikandjohoolola shaEengodi Protasius Neshuku okwa koleka ta ti ounona vahapu moshikandjohoololo shaye ova ninga oihakanwa yokukwatwa onghonga kovapambele vavo ashike oibofa iha i lopotwa kopolifi omanga imwe ohai lopotwa kwa lata.
“Ovadali unene tuu ovakainhu ove hole okuamena ovapambele vavo ngeenge va longe ounona ominyonena dopaixulo,” Neshuku ta ti. Okwa ti eshi oha piyaneke elihongo lokaana ngeenge ka kwatwa onghonga shaashi alushe oha kala ta ka hepekwa komadilaadilo ngeenge ke li meetundi.
fhamalwa@nepc.com.na