Elelo laUkwanyama nalo otali lili imwe yomoilyo yalo oyo ya xulifa omolwombuto yoCovid-19 oyo i li tai hepeke oshilongo noya twaalela eemwenyo davahapu. 

Meenghundafana a ninga naKundana omunashipundi welelo lOukwanyama Goerge Nelulu okwa hokolola ta ti oshikondo shavo shopamufyuululwakalo nasho osha kumwa konghalo yombuto yoCovid-19.

Nelulu okwa ti elelo laUkwanyama ola kanifa ovaleli vavali, va xulifa kombuto ei yoCovid-19, omo mwa kwatelwa hamushanga welelo laukwanyama yee oku li mwene womukunda Onekwaya yokouninginino Peter Amoomo, naSamuel Shilongo mwene woshikandjo, Weyulu Hedimbi ou  a xulifa Omaandaxa omafiku 30 June 2021, nota fudikwa mEtivali loshivike eshi.

Onghee okwa ti omadjepo avo oku li a kuma unene elelo laUkwanyama shaashi ova fiya po omwaka wa kula.

Nelulu okwa hokolola yoo ta ti elelo laUkwanyama ola taalela oupyakadi wovanangeshefa ava kwa li va pewa omadu okutunga, ndele fiyo opaife ina va futa oshimaliwa osho kwali va ufwa kufuta.

“Okwa li twa pa ovanangeshefa va kula edu opo va tunge, omo kwa li twa tula po eudafano va kale va futa oshimaliwa. Onghee mopaife eshi tu li mefimbo eli lidjuu lombuto yoCovid-19 tai dana onghandangala ovanangeshefa vahapu inava ka dula vali oku uta shaashi ova kumwa konghalo ei yoCovid-19 ya tukuka moshilongo. Onghee ombuto ei oi li ya denga oshikondo shetu shopamufyuululwakalo shaashi oyuuyemo yetu oi li ya shuna pedu neenghono,” Nelulu ta ti. Okwa weda po ta ti oihokolola nayo oya kalekwa manga molwoombuto ei, onghee oshiwana inashi pumbwa okuya koihokolola manga opo ku keelelwe etandavelo loCovid-19.

“Natu liufeni komalombwelo aa a tulwa po koCovid-19 shaashi omukifi ou owa nyika oshiponga neenghono,” Nelulu ta ti.