Elelo lyondoolopa yaShakati ota li hiya aakalimo yomolukanda Uupindi gwokUumbangalantu mOshakati koshigongi shina sha netendululo lyokaalita.
Omugandji gwomauyelele mombelewa yelelo lyondoolopa yaShakati Katarina Kamari okwa ti, oshigongi shoka otashi ka kala ko momasiku 01 sigo 02 gafebuluali nuumvo posenda yUupindi.
“Elalakano lyoshigongi okukundathana naakalimo oshowo okugandja ompito kaakalimo ya gandje omaiyuvo gawo methaneko lyeyambule po lyolukanda lwawo. Elelo lyondoolopa ota li ka tendulula opo li tameke okulonga.
Kamari ta ti, shika otashi keya pa omawuyelele agehe nomilandu nkene yena okulonga nokuyambulapo olukanda ndoka, oku li tula pondondo yondoolopa.
“Aakalimo otaya ka pewa oonzapo dho mahala gawo, omeya nolusheno, ngaashi nana aakalimo yokOnawa mboka ya tembudhwa kolukanda kwa li nale, Eemwandi mOshakati,” Kamari a fatulula.
Agwedhapo ta ti, omagumbo ngoka taga katsa mumwe no pate nenge itaaga tsu kumwe nondjla yo kaalita, otaga ka monenwa omahala gamwe.
Kamari ta ti, oyena nale omwaalu gwomagumbo ngoka ge li methaneko lyokutendululwa, onkene kehe ngoka taka gwedhako komwalu ngoka, itaka pitikwa pethimbo ndika.
“Kombinga yomangundumano ngoka ga indikwa omolwa omukithi gwoCovid-19, ota tu kapitika ashike aantu ye li 50 mesiku limwe,” a popi ngaaka.
Ta ti, kehe ngoka ena ehalo okuthika koshigongi shika natume okatumwalaka okafupi, kena edhina lye, esiku ta holoka koshigongi nethimbo konomola 081 1415 381. Kamari ta ti, otaya kahogolola mo ashike aantu 50 mboka yaka tuma tango okatumwalaka. Okatumwalaka otaka hulu okutumwa nena, 29 Januali. “Elalakano okuyambulapo nokuhumitha komeho ondoolopa yaShakati, onkene ayihe mbyoka otayi kaningilwa natango omalukanda agehe mOshakati,” Kamari a popi ngaaka.
Kamari okwa li ayelitha kutya, Uupindi okwatopolwa moombinga mbali onkene ombinga ndyoka ya ipyakidhilwa nayo, ombinga yokuumbangalantu pethimbo ndika.
Okwakumagidha woo aakalimo yomomalukanda galwe nenge kombinga ndyoka yUupindi inayi adhika natango ya ngungumane oshoka natango uuwanawa owu li komeho ga wo.
Selma Shikesho, gwomolukanda Uupindi gwokuuninginino ngoka ena okapeleki ke kehulilo lyUupindi o ta ti, okwa pumbwa ekwathelo lyomendeelelo oshoka mpoka e li ohapu uudha omeya.
“Ondi li shi li pehala ha li ende omeya, ashike kandina nkene. Otandi yi peni? Omeya ngele ota geya naga faalelendje oshoka kandina mpoka tandi vulu okuya. Elelo lyondoolopa na li pendje ehala mpoka tandi vulu okudhengela okapeleki kandje,” Shikesho a popi ngaaka.
Shikesho dhoka okwa li edhiyamukula Kundana, sho a li emupulapula kutya otaningi ngiini ngele omeya ogeya ogendji, omanga egumbo lye lyi li mondjila, moshana sho meya.