Ohapo Omaueuozonjannda nandarire kutja ookahuro ohongora noomusepa wOkarukondwa Komatoororero ka Pukiro kake nyangatara pendje na indu ngahino tji mu notjitjitwa tjimwe poo tjarwe otji kemunika ayo nambano ka yanḓimuka mozomboṱu zouvi novipo.
Osondaha nda zuko omayuva tji ya ri 14 komueze imbwi rari rimwe romayuva ingo omaheṋa tjimuna omayo wohunguriva okahuro inga tji kari mongavangava. Kakutja omongavangava ya kangamwa auhe muko nungwari ka yanḓiminwe i yomatemba pekepeke nga zu minda pekepeke tjinene okuza mEpako nu kuwo aku rikwamba ingo wovature va Pukiro pombamba yawo. Mu mwa ri omatemba woporise nga usukire aye tjakaṋa ondjira indji yomberoo yomutoororwa wOkarukondwa Komatoororero. Ovandu tjiva mbe hi nokutjiwa poo mbe ha ri ava zuu ave kumwa kutja tjii hapo mokahuro mwa tjitwa otjikwaye nu mamu kayenda tjike? Mwa tjitwa oumba umwe poo warwe? Tjandje nangwari omunane wokehi wehi Nangolo Mbumba, uri mokahuro. Embo riurisiwe ndi mari tja: ™mu yareree oviyarwa kangamwa avihe ma kapitire po tjimuna Omuna wOmundu tja hitire mu Jerusalema kokasino na yarerwa oviyao vyomiti novimbumba mbya ri amavi zemburuka omapitiro wOvaisraela mu Egypte avi yoroka avi tja: Hosana!
Mbumba tjandje wa kavanduruka kOtjinene otjorupa rouyenda we mOmaheke. Movingi mOtjinene wa hakayenene ku novanane pomberoo yOrata yOkarukondwa Komatoororero owo tjinene pu ve mu tjivisire ouzeu wourumbu mbu mau honine Okarukondwa na mOmaheke ayehe. Muwo mu mu nondjara movandu. Ave mu yatisa potjikunino tja Fraser pozOnḓuno nawina potjiungura tjomatumbiro wozohunguriva nawina onganda yomikova.
MEpukiro wina wa wanene nOmbara yOvambanderu, Eben Tjozohongo Nguvauva, pOmimbondevitano nozorata ze nave tara moviṋa pekepeke muwo mu mu nourumbu mbwa kuramene Okarukondwa nawina omatungiro womberoo youhonapare nga kuramisiwa i yohoromende oure wozombura nai. Pendje nozondjira nḓa hahauka nozondjombo ozoheṋa.
Ombongarero indji yoviṱo vyarwe pekepeke ndja ri pomberoo yOkarukondwa ya wombere tjinene tjnga aya ri amai sokukara ko momurongo naimwe yomuhuka posi ya mozoine tjandje ngunda kai yauta. Ovandu tjiva tjandje va undju va hahiza va i.