iiningwanima yinyanyaleka oyindji onkene tayi holoka moshitopolwa shaMusati, ngaashi omaso gombaadhilila, mwa kwatelwa omaikuthomwenyo, omadhipago nosho wo iiningwanima yaantu taya si momeya.

Kundana sho a li a ningi omapulapulo mo mikunda dha yooloka moshitopolwa shaMusati, kutya uupyakadhi hawu eta omaso ngoka ohau zi peni, oyendji oyali ya gandja omayamukulo ga faathaana kutya, euveko inali gwana moshigwana olyo unene tali eta uudhigu.
Matheus Shipanga ayambukile mOutapi  noku li omupolisi ngoka ngashi ngeyi eli moshipundi shevululuko, okwa ti, okwa dhidhilike kutya aakalimo yomoshitpolwa shaMusati oye na ewuveko inaali gwana.

“Ngele ya adhika kuupyakadhi, ka ye na ontseyo nkene ye na okuninga opo omawupyakadhi ngoka ga kandulwe po.  Ohaye shi tula miikaha yawo yene,” Matheus ta ti ngaaka.

Ta ti, oyendji ka yena ontseyo yomahungo mwenyo, nuuna ya adhika komawupyakadhi ohaya thigwa po komadhiladhilo, e taya tokola ashike okulonga iilonga mbyoka ye na komitima dhawo.

“Unene mboka ye na ekwatathano lyopaihole, oya itaala kutya ngele gumwe okwa ti ota hulitha po ohole ya wo, okudhipaga ashike ya tula komeho. Ta ti ka ye na ewuveko kutya ongele okwa ningi oshingwanima shoka, otashi ke mu petha egeelo,” Matheus a popi ngaaka.
Mathues okwa gandja omayele ge ta ti, oshi hwepo ngele moshotopolwa shaMusati, unene momikunda mukale muna ooprogalama dhokulonga aakalimo, nkene ye na okuyanda noku kandula po omaupyakadhi.

Maria Paulus, okwa ti omvo gwayi okwa kanitha omumwayina kadhona ngoka a dhipagwa ku kuume ke komiihole.
Ta ti, mumwayina okwa kala a talela omahepeko ule wethimbo, nonando a kala teshi lopota kopolisi,  ihe kuume ke komiihole okwa kala owala ha mangwa po nena ye konima yoshiwike okwa za ko kodholongo.

“Ngeno okwa li tu shishi kutya ope na omahungo mwenyo nenge tuna ontseyo shoka tatu vulu oku ninga, okukeelela omahepeko ngoka, ngeno omumwameme ina sa,” ta popi ngaaka.

Omukuluntu gwopolisi moshitopolwa shaMusati Titus Shikongo okwa ti, oya kambadhala okuuvithako aakalimo yomoshitopolwa shaMusati, onkatu yena okukutha, uuna ya iyadha  muupyakadhi wa kwatela mo omahepeko.
“Kehe ethimbo otatu shanga miifo, otatu popi mooradio ihe oshigwana itashi pulakene. 
Uupyakadhi ohawu kandulwa po uuna wa lopotwa, onkene oshigwana nashi hulithe po oku kala sha mwena omanga shi na omawupyakadhi ngoka haga ka shituka omaso,” Shikongo ta ti ngaaka.