Ehangano lo-MTC Kalimanjaro Boxing Academy ola iyamba opo li kale tali deulila ovanafikola monooli oudano weengonyo.
Ovakulunhufikola va dja keefikola da yooloka, ngoloneya woshitukulwa shaShana noshoyo ovanambelewa va dja kouministeli womaudano okwa li va shakena mOshakati Etitatu opo va kundafane etulomoilonga lomadeulo oudano weengonyo meefikola.
Omunashipundi woMTC Kalimanjaro Boxing Academy Joseph Benhard okwa ti elalakano okuyandja omhito kovanafikola voumati opo va kale tava longifa ounongo wavo tashi pitile mokukufa ombinga moudano weengonyo ngaashi naana hava kufa ombinga momaudano a yooloka.
“Otu na ounona vofikola voumati vahapu meefikola ve na ounongo itau longifwa, onghee ohatu kala hatu yandje omadeulo kovanafikola ve na ehalo lokukala tava kufa ombinga moudano weengonyo,” Benhard ta ti.
Okwa ti konima yomadeulo ovanafikola otava kala tava kafindafana moudano weengonyo moshitukulwa neefikola da yooloka nokonima otava ka tuminwa opo va kafindafane neefikola moitukulwa ya yooloka nokudja opo otava tuminwa va ka kufe ombinga kondje yoshilongo.
“Oudano weengonyo owa pumbiwa meefikola. Ovadali ina va kelela ovanafikola va kufe ombinge moudano weengonyo. Onghee osha fimana ngeenge ovanafikola tava longifa ounongo wavo,” ta ti.
Okwa weda po ta ti MTC Kilimanjaro ota lalakanene opo moshilongo mu kale muna ovanhu vahapu hava kufa ombinga moudano weengonyo.
“Omadeulo otaa kala taa ningilwa meefikola konima yeetundi onghee okulunhufikola nava longekide eenhele dokuningila omadeulo,” ta ti.
Moshipopiwa shaye ngoloneya waShana Elia Irimari okwa ti oudano weengonyo owa fimana meefikola shaashi eshi otashi kelele ovanafikola vaha hepife ounongo wavo.
“Ohandi indile ovanangeshefa, ovaleli vopapolitika vendodo da yooloka noshoyo omahangano a dja kondje yoshilongo opo e uya momwaalu muhapu a yambidide omadeulo ovanafikola noshimaliwa shaashi ova pumbwa oshimaliwa shokulanda oikwafifo,” Irimari ta ti.
Ovakulunhufikola va dja keefikola da yooloka mwakwatelwa oshitukulwa shaHangwena ova ti ova tambula ko omadeulo oudano weengonyo taa ka pewa ovanafikola shaashi eshi otashi eta yoo vali oidjemo yepito iwa moilongwa yavo.
Ova weda po tava ti pefimbo ovanafikola tava ka deulwa otashi ka eta yoo vali neduliko meefikola.
fhamalwa@nepc.com.na