Apehe Mberihahiza Kamberii Jacqueline Tjikuzu pe ri oviungura mavi sopoka.
Nomambo inga umwe wOvatjangerepo vozombara zongutasaneno ya Kandjoze mongondjero yOtjiṱiro Otjindjandja, Nokokure Kambanda Veii, wa ririre nokuvirikiza omukwao. ™Kamberii wa ri nomeriyandjerero, wa ri nongamburiro, motjirwa tjOtjisuta. Okutja otje riyandjere auhe kaparukaze uriri. Tji mamu ungura mamu sembamisa otjitjitwa omundu ngoo tjiwa kutja tji wa yandja kotjiṋa orupa rumwe otja ihi matji kaungurwa i yove, ko nokuhepa okukakotoka kombunda okupura kutja wa tjiti vi. Ootjiwa nawa kutja otjiṋa ho matji ungurwa,∫ Veii ma tja nao.
Oroviungura nda zu ko ovimbumba novimbumba okuza kozoheke azeine za Namibia ngandu komuhuka kehi eraranganda na Namibia Otjauana, vya woronganene mOvinjuru tja Pukiro mOkarukondwa kOmatoororero ka Pukiro mOrukondwa orunene rwa Maheke.
Okuyandja ondjozikiro nokurira ozohatoi zomasuvisiro omasenina waumwe wavo kutja omotjitamba tjongamburiro, omokuhwa okuwoko kezumo moungetjefa (ozonganda zoviungura novirandisiwa), erapi rOtjiserandu, omongondjero yOtjisuta tjOtjiṱiro Otjindjandja tjOvaherero, Ovambanderu nOvakwena; na wina moupanga nouzapamwe noumuhoko okuza mezumo rimwe ngandu momaanda.
Auhe ama hununa ko onyosa aayo okokongombe ondwezu nungwari onḓenḓu, Mberihahiza Kamberii Jacqueline Tjikuzu, omukwendata omunaakweyuva ngu ma yaruka movakweyuva. Kehi yombongo ye yOruuano eye ma ri omuramba, Oritjatano ave tokerwa na ye noroviungura ave tjirwa na ye, ave uhara na ye tji mai i i katjombokera ozoine zomapeta omanene otjoruveze rwokupepera ave mwesa ma hungame Ombingombe, Omaueuozonjanda, ma kasuvisiwe.
Pendje notjiṱiro tjOmuramba ka zemburukirirwe Kamberii wina wa ri omupyuke mongondjero yOtjisuta okutuurungira mOkomiti yOvaherero nOvambanderu yOtjiṱiro Otjindjandja oyo nai pu nOtjirata tjOvakwena, Ovaherero nOvambanderu mOtjihungiriro tjOtjiṱiro Otjindjandja tjo-1904-1908 nḓe ungurira po ozombara zOnḓuvasaneno yOmairokumwe wa Kandjoze.
Movaheṋendu mba ri mOvinjuru pa ri Ombara yOvambanderu Eben Tjozohongo Nguvauva, Ombara yOnguatjindu nOuhonapare wOmbazu wa Kambazembi, Ombara ya Tjimana nOuhonaapre wOmbazu wa Hoveka, Turimuro Hoveka, nOrata yOkarukondwa kOmatoororero ka Pukiro, Pakkie Pakarae, na varwe ovengi.