New Era Newspaper

New Era Epaper
Icon Collap
...
Home / Likalibe lifiwa misebezi mwa Zambezi

Likalibe lifiwa misebezi mwa Zambezi

2021-05-24  Aron Mushaukwa

Likalibe lifiwa misebezi mwa Zambezi

Likalibe bamashumi amabeli kailiñwi nebafilwe misebezi mwasikiliti sa Zambezi kikatengo ka Project Hope wakubeleka mwahala sicaba. 

Likalibe nebabile limembala zakatengo ka DREAMS, ili kakatalima zakufukuza kuambalakana kwabutuku bwa HIV mwahala likalibe ni basizana. 

Hana bulela kanako yakutabela kufiwa misebezi kwalikalibe, mubusisi wasikiliti sa Zambezi Lawrence Sampofu naize likalibe bafumani lituto zelukela, mi baitukiselize kusebeleza sicaba. “Likalibe babalateha mwakona kutalimana ni masulungundu abupilo, sihulu hamunze muhula. Muezize cwalo mi seli nako yakuli muye muyo sebeleza ni kutisa cinceho mwahala sicaba,” nekubulezi Sampofu.

Nasusuelize hape babanca mwasikiliti kuitenga mwalitaba ze ezahala mobapila, kakuli likona kubakwalulela minyako yeminde kuli bafumane misebezi. Yomuñwi walikalibe bane bafumani misebezi Linnety Mutabelezi nakandekile kamo katengo ka DREAMS neka cincize bupilo bwa hae. 

Naize nalatehezwi kibashemi bahae asafokola mi ayo ipumana ainzi mapoto ni ndatahe banabahae, ili yana munyandisize. “Lika kaufela neli zamaya hande sapili mane nalibala kuipabalela kuli nibe musali yakutekeha,” nazbulezi. 

Natokile kuli mulikanahae namutolokezi zakatengo ka DREAMS, ili kane kacincize bupilo bwa hae, mi natabile kufiwa musebezi. “Niyema fa kuba yaitukiselize kuyo belekela sicaba, mi ni itukiselize kuyo eleza babanca kuli bapile bupilo saka,” nekubulezi Mutabelezi.


2021-05-24  Aron Mushaukwa

Share on social media