• September 28th, 2020

Likolo za kwamukunda lihana mulelo wa muuso


Mubihi wa Mutende

WINDOKO – Likolo za kwamukunda viki yefelile neli hanile mulelo wa liluko la tuto wa kukwalula likolo, kasamulaho akusundwa ki katengo kaka yemela maticele ka Nantu. Liluko neli cincize muhupulo viki yefelile kaku bulela kuli likolo lika kwalula mwa likalulo zetalu, ili kubeela kwatuko zibahazo ya Mueteleli Hage Geingob ya la 28 Muyana yakuli likolo likwalule kacenu. Yomuhulu wa sikolo sa kwamukunda sa Windoek Gymnasium Colette Rieckert nanyemisizwe kitaba yeo.
“Luna kakuba katengo kaka yemela likolo za kwakumukunda luhana tiyeho yeo,” nabulezi. “Zibahazo ya la 28 Muyana ki Mueteleli Hage Geingob ne ezizwe kasamulaho alingambolo zeñata, ni kasamulaho akueza patisiso. Kono cwale tutengo totu yemela babeleki kasamulaho akubulela kuli limembala zabona habalati kubeleka ni cwalocwalo, luna ni kunyanda. Katengo kao haka yemeli limembala zaluna baba wela mwa katengo kalikolo za kwamukunda. Luka zwelapili ni mulelo wa luna wa kukwalula likolo, sihulu za kwamukunda.

Ni utwela likolo za muuso butuku haiba balumela taba ye. Kamaikuto aka likolo zeitukiselize lina ni kukwalula, ili kuli banana basike kunyanda sina habana ni tukelo ya kuituta mwa Namibia.” Viki yaale Geingob nakile azibahaza kuli baituti balitopa za 10, 11 ni 12 baswanela kukala lituto la 1 Muimunene, mi litopa zeñwi lina ni kukuta kacenu. Piho yene filwe ki liluko la tuto viki yefelile neize baituti ba litopa za 7, 8 ni 9 baka kutela kwasikolo kacenu mwalikiliti kaufela kwanda sikiliti sa Khomas. La 14 Muimunene baituti kaufela balitopa za 4, 5, ni 6 baka kutela kwasikolo hamohocwalo ni mwasikiliti sa Khomas. Mi balitopa za 7, 8 ni 9 mwasikiliti sa Khomas ni bona baka kutela kwasikolo lizazi leli swana. Piho yeswana ibulela kuli balitopa za 0-3 baka kutela kwasikolo la 21 Muimunene. Liluko neli ize kasamulaho azibahazo ya Mueteleli, liluko neli ikambozi ni katengo ka Nantu hala sabo ya kakokwani ka Korona, ni kuekezeha kwapalo yababana ni kakokwani. Liluko neli ize ngambolo yeo netisize buiketelo bo, ni kuli tiyeho yakukwalula likolo ikaswana itisa butata, ni kuli mazazi akuituta aka lemuswa.


Staff Reporter
2020-09-07 10:11:21 | 21 days ago

Be the first to post a comment...

You might also like...