KATIMA MULILO – Libunda la masila asa olelwi kuzwelapili kubeya makete abatu mwa likayamana mwa Katima Mulilo, kasamulaho katengo katolopo nekayemisize peleko yaku olela masila kweli yefelile. Kasamulaho akulaelwa kufundota sinca peleko yaku olela ki Katengo Kakatalima Sinca Lipeleko. Ba New Era kweli yefelile nebabihile kuli babalalu bane basikafiwa peleko neba bilaezi kwakatengo kakatalima sinca lipeleko, kasamulaho akusafiwa peleko kikatengo katolopo ya Katima Mulilo, kamabaka akusaluwa motikala ye olela, kukupa peleko kwanda pisinisi yeñolisizwe, niku saeza hande mwamisebezi yakwamulaho. 

Katengo kakatalima sinca nekaize katengo katolopo nekalobile mulao obona zalipeleko mi sebaba laela kufundota sinca peleko. Kono taelo yeo itiselize sicaba butata kakuli baitinga kwa katengo katolopo ku olela masila. Libunda lamasila asika olelwa nilona liteñi kwa musika, mi libeya makete abaleki nibalekisi mwabutata. Hana bulela niba New Era muzamaisi wa musika wa Katima Mulilo, Gloria Siluka naize baitingile feela kwa katengo katolopo kuolela masila abona. “Haluna motikala yakulonga masila,” nabulezi. Naekelize kuli masila asika olelwa abeya makete abaleki nibalekisi mwakozi. “Nikupa bakatengo katolopo kuli balukise litaba zabona, kakuli kibutata luli. Haiba mayemo acwana inge azwelapili hakuna babakana bakena mwamusika kakuli libunda la masila li inzi kwamakenelo amusika,” nekubulezi Siluka. 

Mayemo satepelela hahulu bakeñisa litabula mi pula yene inela mwamazazinyana, itisize kuli masila akale kununka ili taba yetisa linzii mi hape ikona kutisa matuku. Hana kupilwe ku alabela fateñi, sibuabui wa katengo katolopo Muyoba Muyoba naize basweli kusebeza katata kufumana tatululo sakata. “Bakeñisa kuli kalulo yalipeleko inga nako, lufumani likampani zaswalelele mi sebakalile kuolela masila, nabulezi.  Naekelize kuli kukabanga nako kakuli tolopo kiyetuna. Batu babañwi sebasweli kuyumbaka feela masila kuli babakise katengo katolopo. Kono Muyoba naize kueza cwalo hakuna kutisa tatululo. “Kuyumbaka masila hakiyona tatululo, kuka ekeza feela kwabutata boluli kubona. Kakuli haiba matuku aswana sina kolera inge azuha, hana kuketa, batu kaufela bakaziyeleha. Kacwalo nikupa sicaba kuli basike bazwafa halunze lubata tatululo,” nekukupile Muyoba.