New Era Newspaper

New Era Epaper
Icon Collap
...
Home / Maswaniso a Lukato ahalifisa lubasi

Maswaniso a Lukato ahalifisa lubasi

2019-11-25  Aron Mushaukwa

Maswaniso a Lukato ahalifisa lubasi

KATIMA MULILO – Lubasi lolu fumaneha kwa Sachinga mwasilalanda sa Sibbinda, luhalifile kasamulaho muetapili wakopano ya National Democratic Party (NDP) Martin Lukato, nasebelisize mukiti wabona waku amuhela muhabo bona yanali kwa Dukwe, kubabaza kopano yahae ya NDP. 

Lukato ubihiwa kuli nailo nga maswaniso inge asweli kubina, mi kasamulaho abeya maswaniso famakepe aintaneti, ili teñi buñata neba aboni. 

Kono membala walubasi yana bulezi nimubihi yo, naize lubasi nelusikataba kasamulaho akulemuha kuli Lukato nasweli kubulela kuli maswaniso nangilwe kwamukopano wakubabaza kopano yahae kwa Sachinga. 
“Nekuna ni mukiti kwa Sachinga waku amuhela muhabo luna yanali kwanda naha. Lubasi nelu kubukanyize masheleñi kueza mukiti wakamuhelo, mi Lukato saya kwateñi nikukala kuyobina, nikusebelisa mukiti waluna kuli neli wakubabaza kopano yahae, nabulezi lika zabuhata,” nekubulezi membala wa lubasi. 

Naize nebailo kokota Lukato kwa khuta ya Sachinga kono naicanganisize kakubulela kuli nali kwa Windoko. Azwelapili kusabisa kuli ukazekisa Lukato haiba inge asaikupeli maiswalelo. 

Hana kupilwe kualabela falitaba zeo Lukato aitatula hala maswaniso ane abeilwe faintaneti.
Nanitifalize kuli maswaniso nailo ngiwa kwamukiti wa lubasi isiñi kwamukopano wahae, kono alatula kuli kiyena yana sweli kuahasanya.

“Lizazi leli bulelwa nenibile nikupotela mandu kuyo babaza kopano yaka kwa Sachinga, mi nayo feleleza kamukopano kwalibapalelo la Sachinga. 

Kasamulaho seniya kwamuktiti obulelwa, kakuli neniziba bañi bamukiti. 
Neni ile kwateñi kuyo bona isiñi kuyo babaza,” nekubulezi Lukato. Lukato ubulela kuli maswaniso nangilwe kibatu bane bali kwamukiti, kakuli nekuile batu babañata. 

“Foni yenibelekisa haingi maswaniso. Maswaniso nasi kangiwa kina kapa membala wa NDP. 
“Mwendi nangilwe kibabalumelelana niluna, kono bañi bamukiti baziba bane banga maswaniso. 
“Neni lemuhile zamaswaniso faintaneti kono hakina waku abeya fateñi,” nakubulezi mueteleli wakopano ya NDP.


2019-11-25  Aron Mushaukwa

Tags: Zambezi
Share on social media