Ovakalimo vomolukanda la Kuisebmund moWalvis Bay otava ka pewa omakwafo okudilila mombelewa yamayola wodoolopa. 

Omafiku a pita okwa lopotwa eebashu di li nhee da pya po komundilo da fiya ovanhu poluhaela moKuisebmund.

Omo kwa li mwa lopopwa kutya ovakalimo ova kanifa omaliko avo aeshe, ashike elao linene inamu kanena nande omwenyo womunhu, nonande pe
na omukainhu umwe oye e li a pya kombuda.

Meenghundafana a ninga naKundana mayolo wodoolopa yaWalvis Bay Trevino Forbes okwa hokolola ta ti ombelewa yaye oi na oshisho noshiwana notai kwashipaleke kutya otai ka yakula oshiwana eshi shi li moundjuu.

Forbes okwa ti ombelewa yaye otai ka yandja oikulya, oikumbafa, oikutu yokudjala, neembete oshoyo omidjalo dofikola dovanafikola edi da pila meebashu omo.

“Oinima ei otai ka yandjwa mexuliloshivike twa finda. Onghee omakwafo okwa nuninwa ashike ava ve na eebashu davo da pya po,” Forbes ta ti.

Mayola okwa weda po vali ta ti ombelewa yaye otai ka yandja elongo nomadeulo kovakalimo vaWalvis Bay nghee ve na okukala tava longo nomindilo momaumbo avo.

Okwa ti odoolopa yaWalvis Bay oyo imwe ya didilikwa hai pilwa eebashu dihapu neenghono.

Okwa hokolola ta ti ovanhu ovakanifa omaliko avo eshi a pila meebashu omo, onghee ovena oku yambidindwa ngaashi tashi dulika.

 Yee ta kunghulile oshiwana opo shi takamife omundilo unene tuu pefimbo eli loutalala.