KATIMA MULILO – Mayumbelo amanca aswalelele mwa Katima Mulilo  asebeliswa ki katengo katolopo atisize ñumbili mwatolopo yefumaneha mutulo upa, mi buñata bwa bayahi banga taba yeo kuli ibeya makete abona mwabutata, bakeñisa kuba bukaufi ni libaka zamaino, nikuli katengo katolopo haka sikafumana liñolo leli kalumelela kusebelisa sibaka sale kuzwelela kwa liluko la lilalanda ni bupoti. Kacwalo mayumbelo awo asweli kusebeliswa isi kamulao. Paki kuzwelela kwaliluko la lilalanda naize katengo katolopo neka kupile liñolo leo kono hakasika lumelelwa kale, kacwalo katengo katolopo kakonwa kuzekiswa. “Sapili neba kupile kuli baekelezwa nako kwamayumbelo akale, kono kupo yabona nehanilwe, mi sebakupiwa kuli batise piho yapatisiso yasibaka sa swalelele, kono neba sikalatelela hande milao, kubonahala inge batu babañwi habangi lika kuba zabutokwa. Mayumbelo afi kamba afi muna nikufiwa liñolo pili musi kakala ku asebelisa,” nekubulezi paki.

Paki na elelize kuli sibaka sa mayumbelo amanca nesikona kubelekiswa hakuba nikamaiso sakata. “Mayumbelo afumaneha limita ze mianda iketalizoho kuzwa kwa mukwakwa, kacwalo ki kwahule. Kono butata ki kuli hakuna lukwakwa kwateñi, mi hakuna yazamaisa kwateñi, kubona kuli batu haba yumbaki feela. Isi kuli bayumbe kuya kwapili, bayumba banze basuta kwa mukwakwa,” nekubulezi paki. Kwalineku lelinde katengo katolopo neka kalile ku olela masila mwatolopo kweli yefelile. Mi base basepisize kuli baka kutiseza batu masheleñi abona mwalikweli zene basika olela, mi kubihilwe kuli baka latehelwa mali afitelela bolule baba beli. Hana kupilwe ku alabela falitaba zeo, muzamaisi wa katengo katolopo, Raphael Liswaniso naize katengo hakana buiketelo konji kuyumbela kwa mayumbelo acwale. “Haluna kwakuya mi halukoni kusiya masila mwatolopo, luna ni kufumana tatululo. Luna ni mulelo wakufumana musima wakuyumbela kono ukwa Liselo. Luna niku bakupa, lukona feela kusebelisa sibaka sale haiba inge balumela. Kono kanako yacwale hakuna tumelelano,” nekubulezi Liswaniso.

Hana buzizwe zakutokwa hande kamaiso kwateñi, Liswaniso naize kuna ni “ bakanteli kwateñi, mi batu baziba kobalukela kuyumbela. Batu babañwi bayumbaka feela fokusika lumelelwa. Kana kikuli luli bana ni kulutiwa?” nekubuzize Liswaniso.  “Haluna kukwanisa kusinya mali akatengo katolopo kubeya bakanteli kai ni kai. Batu baswanezi kuikalabela, kinaha yabona, butata habutaha habuteli feela katengo katolopo kono butela mañi ni ni mañi, kacwalo batu kaufela baswanezi kuba ni buikalabelo,” nabulezi. Nabulezi hape kuli batu nebayumbela faukaufi kakuli limotikala zabona neli kakatela. Kono fa hakusali cwalo kakuli bapatehile kulukisa mukwakwa. Naekelize kuli kwanda kubeya kwateñi balibeleli katengo kase kakalile kuolela masila ane ayumbelwa fakaufi niku aisa kokuswanela.