Festus Hamalwa
Kansela woshikandjohoololo shaMulonga Erickson Ndawanifa okwa ti ombelewa yaye oya talela eshongo linene eshi moshikandjohoololo shaye mu na ovanhu ve dulife 100 ve na oulema va pumbwa omakwafo.
Ndawanifa okwa indila oshiwana, omahangano a yooloka ile ovaleli vopapolitika opo va kwatafane nombelewa yaye ngeenge va hala okuyambidida ovanhu ve na oulema ve li moshikandjohoololo shaye.
Edi Ndawanifa okwe di popya pefimbo eshi kwa li omukainhu weedula 28 ou e na oulema ta pewa omakwafo kehangano EDDD Investment PTY komukunda Eenghango moshitukulwa shaHangwena Olomakaya. Kansela okwa pandula ehangano lo-EDDD eshi la yambidida Ndapunikwa Shihepo eshi a pewa ombete yoshinanena i na omalola opo a kale ta pitifwa mo monduda ngeenge a pumbwa okudengwa komhepo.
Okwa kunghilila oshiwana opo shi kale tashi yakula nawa ovanhu ve na oulema nombili nohole momaumbo avo. “Ovanhu ve na oulema inava pumbwa okukala tava holekwa meenduda ndele ova pumbwa okukala tave etwa pondje opo va dengwe komhepo,” Ndawanifa ta ti. Okwa weda po ta ti ovanahu ve na oulema nava lopotwe kombelewa yaye opo ombelewa i kale ya didilika omwaalu wovanhu ve li moshikandjohoololo.
Moshipopiwa shaye pefimbo ta yandje omakwafo, omunambelewa a dja kehangano lo-EDDD Elise Shikongo okwa ti ehangano lavo otali lalakanene okushakaneka epangelo ondjilakati tashi pitile mokuyandja omakwafo kovanhu ve na oulema, eefiye noshoyo ounona voukwanaluhepo.
Shikongo okwa ti ombelewa yavo oya lopotelwa kombinga yaShihepo eshi a pumbwa ombete ina omalola, omilambo nosho tuu omakwafo a yooloka.
Onghee okwa ti naashi osha eta opo ehangano lavo li landele omukainhu oo oipumbiwa. Okwa weda po ta ti eshi kashi shi oshikando shotete ehangano lavo tali yambidida ovanhu ve na oulema eshi la kala shito nokuyandja omakwafo kovanhu ve li momhumbwe.
Kristofina Chritofa oku li oye mwene weumbo omu hamu di Shihepo, yee oku li yoo vali inakulu waye, okwa lombwela Kundana ta ti okwa pandula unene e li omutekulu waye a yambididwa eshi va kala tava longo noudjuu mokulanda oikwafifo yaye. “Paife omutekulu wange ita ka nangala vali kombete ya kulupa shaashi okwa pewa ombete yaye iwa,” Chritofa ta ti.
Onghee okwa yelifa ta ti ombete oyo otai ka eta elunduluko lakula eshi paife Shihepo ta ka kala ha pitifwa mo monduda opo a dule okukala naye e li mokati kovanhu. Shihepo okwa dalwa e na oulema, yee iha dulu okukala omutumba eshi ha kala ashike a nangala mombete efimbo keshe. Omakwafo a yandjwa okwa landwa kongushu yoshimaliwa N$19 300.