Ounona vahamano moshitukulwa shaShikoto ova kwatwa onghonga momwedi Mei, mwa kwatelwa ounona vavali ve na oudu wopamadilaadilo. Okaana keedula 14 ke na oudu wopamadilaadilo oka kwatwa onghonga komulumenhu weedula 30, omunailonga meumbo lavo. Oshiningwanima eshi osha ningilwa momukunda Omulondo-Ontananga Etivali efimbo lokomatango. Omukulunhu wopolifi moshitukulwa shaShikoto Komufala Teopoline Kalompo-Nashikaku okwa hokolola ta ti omufekelwa okwa ufana okaana monduda yaye noku ka longela omunyonena wopaixulo. Oshiningwanima shikwao, okakadona keedula 16 ke na oudu wopamadilaadilo vati oka kwatwa onghonga kovalumenhu vambulavo vavali ovakwashiwana vaAngola hava longo meumbo omo. Oshiningwanima eshi osha ningwa omudo wa dja ko muDesemba meumbo lavo momukunda Onethika ashike ouyelele opo wa monika mo momwedi ou.
Opolifi oya hokolola tai ti ovafekelwa ova kala nokukwata okakadona aka onghonga lwoikando ya yooloka.
Vati ovafekelwa ova ningila nakuningwa oshihakanwa omatilifo opo ehe shi lombwele omunhu kutya okwa kwatwa onghonga.
Opolifi oya hokolola tai ti xe yanakuninga oshihakanwa okwa li kulombwelwa kokamona kutya ohaka longelwa omunyonena wopaixulo kovafekelwa ashike xe okwa li e shi vati omona ota ningi omashendjo. Okudja opo vati okwa ka ningila omalapulapulo ovafekelwa nokonima omufekelwa umwe okwa popya oshili kutya ova kwata okaana onghonga.
Oshiningwanima shikwao, okaana keedula 11 vati oka kwatwa onghonga komulumenhu weedula 32 momukunda Okandjeke moshitukulwa shaShikoto. Otaku hokololwa kutya okaana oka hangika taka ende moixwa nokonima omufekelwa okwe ka heka opo va ka nangale nako. Okaana keedula 12 nako vati oka katwa onghonga nokumitikwa komulumenhu wambulavo momukunda Okashana kIitembu moshikandjohoololo shaMuthiya.
Opolifi oya hokolola tai ti omufekelwa okwa ningila okaana omatilifo kutya ote ka dipaa ngeenge oka lombwele ovaneumbo kutya okwa ya nako moixulo. Vati ouyelele owa monika mo konima eshi okaana ka tameka okuvela medimo nokudja opo oka twalwa koshipangelo omo eendokotola da ka mona kutya okaana oke na eteelelo. Oshiningwanima shikwao, okaana keedula 10 oka katwa onghonga komulumenhu wambulavo komukunda Uudhiya Waakinta. Otaku hokololwa kutya okaana oka kala nokukwatwa onghonga lwoikando ya yooloka pefimbo ngeenge ina a ya keendingosho. Okaana keedula 11 nako oka kwatwa onghonga komulumenhu womushiinda shavo komukunda Oshalongo B.
Opolifi onghee tai kumaida ovadali opo vaha fiye vali ounona voukadona momaumbo novalumenhu molwaashi ounona paife ova ninga oihakanwa yokukwatwa eenghonga kovapambele vavo.