• May 21st, 2019
Login / Register

Mubakweli mwaliluko lamubu ufumaneha mwatwanelo yamubu


Aron Mushaukwa

Katima Mulilo – Mubakweli Kumuetapili wa Liluko la Kutisezo ya Mubu mwasikiliti sa Zambezi, Charles Musiyalike ufumaneha fahala komano yamubu, kwaminganda yalikomu kwa Mumona ni Nechakala mwasilalanda sa Lusese. Komano yamubu yeo iputezi masika amalalu mi yomuñwi hala masika awo, Morgani Saisai ufitisize pilaelo yahae. Saisai ubulela kuli mubu osweli kulwanela kiwalubasi lwahae mi uipa mululwani ni lubasi loluñwi isi lubasi lwa ba Musiyalike. “Balobile mulao kakueza munganda mihato yebato eza 200 kapa 300 wiko wamunganda waka,” nekubulezi Saisai. Naekelize kuli base bakwaluzi muzeko wakuyangwela mubu nikuina famubu isi kamulao. Nabuzize hape kuli kiñi lubasi lwa Musiyalike halu lobaka mulao molulatela, anze aakaleza kuli basebelisa litulo zabona kueza zebalata.


“Mwahae yaluna neluñozi mañolo akukupa mubu kono hakuna nihaike alimuñwi yana filwe liñolo lakufiwa mubu. Cwale seluna ni maikuto akuli Musiyalike kiyena yalukwalela, kakuli babata mubu waluna,” nabulezi. Hana kupilwe ku alabela falitaba zeo Musiyalike naize mubu obulelwa winzi mwamuzeko, mi Khuta ya Sizo ya Masubia haisikafa kale katulo yayona. “Taba yeo isweli kuzekwa mwakhuta yasizo mi katulo yateñi ikafiwa la 13 Mbuwana alibelele feela. Kacwalo hakuna tuso yakukandeka taba yesali mwakhuta. Kufitela khuta ifa katulo yateñi hakukonwi kubulelwa kuli ni ikungezi mubu, lubasi lwaluna seluinzi fateñi nako yetelele. Mane kiyena yali kwateñi isi kamulao,” nabulezi. Musiyalike nalatuzi hape kuli uitulezi ni mampampili akukupa mubu alubasi lwa Saisai, nikuli usebelisa ofesi yahae kufiteza litokwahalo zahae. “Hakina yafa mañolo amubu. Halukabulela zakukupa mubu lika kaufela likalela kwakhuta yasizo ili kokufiwa liñolo lakulumela, liñolo leo haselifilwe kona ofesi yaluna ikona kufa liñolo lamubu,” natolokile mi nazwezi pili kulatula likakalezo za Saisai.


Aron Mushaukwa
2019-05-13 10:39:52 8 days ago

Be the first to post a comment...